​ގުޅިފަޅު ބިންހިއްކުމުގެ މަޝްރޫޢު ވަގުތީ ގޮތުން ހުއްޓާލުމަށް އަންގައި އިއްޔެ ދިވެހިރާއްޖޭގެ ހައިކޯޓުން ނެރުނު އަމުރު ތަންފީޒްކުރުން މަޑުޖައްސާލުމަށް ދިވެހިރާއްޖޭގެ ސްްޕްރީމްކޯޓުުން އަމުުރުކޮށްފިއެވެ.

ސްޕްރީމްކޯޓުން މިއަމުރު ނެރުނީ، ހައިކޯޓުގެ އަމުރު މިއަދު ދައުލަތުގެ ފަރާތުން ސްޕްރީމްކޯޓުގައި އިސްތިޢުނާފް ކުރުމުންނެވެ. ސްޕްރީމްކޯޓުގެ އަމުރުގައި ބުނެފައި ވަނީ، ހައިކޯޓުން ނެރުނު ވަގުތީއަމުރަށް އަމަލުކޮށްފިނަމަ، ދައުލަތަށް އެކަމުގެ ސަބަބުން ލިބިދާނެ ގެއްލުންތައް އިންތިހާއަށް ބޮޑުކަމަށް ފެންނާތީ ކަމަށެވެ.

އެހެންވެ އެމައްސަލައިގައި ދިވެހިރާއްޖޭގެ ސްޕްރީމްކޯޓުން ގޮތެއް ކަނޑައަޅަންދެން ހައިކޯޓުން ނެރެފައިވާ އަމުރު ތަންފީޒްކުރުމުގެ ގޮތުން އެއްވެސް ފިޔަވަޅެއް ނޭޅުމަށް، ސްޕްރީމް ކޯޓުން ވަނީ އަމުރުކޮށްފައެވެ. ގުޅިފަޅު ބިންހިއްކުމުގެ މަޝްރޫޢު ހުއްޓުވުމަށް ސިވިލްކޯޓަށް މައްސަލަ ހުށައަޅާފައި ވަނީ، 2021 ވަނަ އަހަރު ހ. ޝޭޑީކޯނަރ، ޙުމައިދާ ޢަބްދުލްޤަފޫރެވެ.

ސިވިލްކޯޓުން އެމަޝްރޫޢު ހުއްޓުވުމުގެ ވަގުތީ އަމުރެއް ނުދިނުމުން އެމައްސަލަ ޙުމައިދާގެ ފަރާތުން ދިވެހިރާއްޖޭގެ ހައިކޯޓުގައި އިސްތިޢުނާފްކުރީ 2023 ވަނަ އަހަރުގެ މާރިޗު މަހުގެ 15 ވަނަ ދުވަހުގައެވެ. ފަރުތަކުގެ ޙިމާޔަތުގައި ޙުމައިދާ އެދުނު ގޮތަށް ކޯޓުން ވަގުތީ އަމުރެއް ނެރެދީފައި މި ވަނީ، ގާތްގަނޑަކަށް 3 އަހަރު ފަހުންނެވެ. 

ސިވިލްކޯޓަށް ޙުމައިދާ ހުށައަޅުއްވާފައި ވަނީ، ގުޅިފަޅު މަޝްރޫޢުގެ ސަބަބުން ތިމާވެއްޓަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބެމުންދާތީ އެމަޝްރޫޢު ހުއްޓުވުމަށެވެ. ސިވިލްކޯޓުގައި އަދިވެސް އެމައްސަަލަ ނުނިމި ހިނގަމުން އަންނައިރު، ކޯޓުގައި މައްސަލަ އޮތް ނަމަވެސް މިހާތަނަށް ގުޅިފަޅުގެ ބިންހިއްކުމާއި އެތަން ތަރައްޤީ ކުރުމުގެ މަޝްރޫޢުތައް ސަރުކާރުން އައީ ހުއްޓައިނުލައި ކުރަމުންނެވެ.