ގުޅިފަޅު ބިންހިއްކުމުގެ މަޝްރޫޢު ވަގުތީ ގޮތުން ހުއްޓާލުމަށް ދިވެހިރާއްޖޭގެ ހައިކޯޓުން މިއަދު އަމުރުކޮށްފިއެވެ. 

ހައިކޯޓުން މިއަމުރު ނެރެފައި ވަނީ، މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އާއި ދެކޮޅަށް، އަމިއްލަ ފަރާތަކުން ސިވިލްކޯޓަށް ހުށައެޅި ވަގުތީ އަމުރާއި ގުޅޭ މައްސަލަ ދިވެހި ރާއްޖޭގެ ހައިކޯޓުގައި އިސްތިޢުނާފް ކުރުމާއި ގުޅިގެންނެވެ.

ގުޅީފަޅު ބިންހިއްކުމުގެ މަޝްރޫޢު ހުއްޓުވުމަށް، ހައުސިންގ މިނިސްޓްރީއާ ދެކޮޅަށް ކޯޓަށް ދިޔައީ، ހ. ޝޭޑީކޯނަރ، ޙުމައިދާ ޢަބްދުލްޤަފޫރެވެ.

ސިވިލްކޯޓަށް ޙުމައިދާ ހުށައަޅުއްވާފައި ވަނީ، ގުޅިފަޅު މަޝްރޫޢުގެ ސަބަބުން ތިމާވެއްޓަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބެމުންދާތީ އެމަޝްރޫޢު ހުއްޓުވުމަށެވެ. އަދި އެމަޝްރޫއުގެ ޝަރީއަތް ނިމެންދެން އެމަޝްރޫޢު ހުއްޓާލުމުގެ ވަގުތީ އަމުރެއް ނެރެދެއްވުމަށް ސިވިލްކޯޓަށް ހުމައިދާ ހުށައަޅުއްވާފައި ވީނަމަވެސް އެކޯޓުން ނިންމާފައި ވަނީ އެމައްސަލައިގައި ވަގުތީ އަމުރެެއް ނެރޭނެ ތަނެއް ނެތް ކަމަށެވެ. އެހެން ވަގުތީ އަމުރުގެ މައްސަލަގައި ސިވިލްކޯޓުން ނިންމި ނިންމުން ޙުމައިދާގެ ފަރާތުން ދިވެހިރާއްޖޭގެ ހައިކޯޓުގައި އިސްތިޢުނާފުކޮށްފައި ވަނީ، ހުސްވި މާރިޗު މަހުގެ 15 ވަނަ ދުވަހުގައެވެ.

އެހެންވެ ހައިކޯޓުން ވަގުތީ އަމުރުގެ މައްސަލަ ނިންމަވައި، ހައިކޯޓުން ގުޅިފަޅު ބިންހިއްކުމުގެ މަޝްރޫޢު މިއަދު ހުއްޓާލުމަށް އަމުރުކުރެއްވީ ވަގުތީ އަމުރަކަށް އެދި ހުމައިދާގެ ފަރާތުން ހުށައެޅިތާ އަހަރަކަށްވުރެ ގިނަ ދުވަސްވީ ފަހުން، އަދި ދިވެހިރާއްޖޭގެ ހައިކޯޓަށް ހުށައެޅި އިސްތިއުނާފު މައްސަލައަށްވެސް 11 މަސް ދުވަސް ވީފަހުންނެވެ.

އެމަޝްރޫޢު ހުއްޓުވުމަށް ހުމައިދާ ކޯޓަށް ވަޑައިގެންނެވި އިރު، އޮތް ޙާލަތު މިހާރު އޮތީ ވަރަށް ބޮޑަށް ބަދަލުވެފައެވެ. އަދި ފާއިތުވި އެއް އަހަރުގެ ތެރޭގައި ގުޅިފަޅުގެ ބޮޑު ބައެއް ވަނީ ހިއްކައި ނިމިފައެވެ. މީގެ އިތުރުން، މިސަރުކާރުންވެސް ވަނީ ގުޅިފަޅުން އިތުރު 85 ހެކްޓަރުގެ ބިން ހިއްކާނެކަން ޢިއުލާނުކޮށްފައެވެ.