ރައްޔިތުންގެ މަޖިލީހުގެ އިންތިޚާބުގައި ވާދަކުރަން ކެންޑިޑެންސީ ހުށައެޅުމަށް ހުޅުވާލި ފުރުޞަތުގައި ކެންޑިޑެންސީ ހުށައަޅާފައި ވަނީ 381 މީހުންކަމުގައި އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބު ވިދާޅުވެއްޖެއެވެ.

ޙަބީބު ވިދާޅުވީ، މިއަދު ކެންޑިޑެންސީ ހުށައަޅާފައި ވަނީ 86 މީހުން ކަމަށެވެ. އަދި މިއަދުގެ ހުށަހެޅުންތަކަށް، މާދަމާ ރޭގެ ނިޔަލަށް ޖަވާބުދީ ނިންމުމަށް ދަނީ މަސައްކަތް ކުރެވެމުން ކަމުގައިވެސް ޙަބީބު ވިދާޅުވިއެވެ.

ޙަބީބު ވިދާޅުވީ، ރައްޔިތުންގެ މަޖިލީހުގެ އިންތިޚާބަށް ކުރިމަތިލީ ފަރާތްތަކުގެ، ނަން ތަރުތީބު ކުރުމަށްޓަކައި، ކެންޑިޑޭޓުންގެ މެދުގައި، ގުރުޢަތު ނެގުން ހުކުރުދުވަހު ބޭއްވުމަށް ހަމަޖައްސަވާފައި ވާކަމަށާއި، ގުރުއަތުލުން އޮންނާނެ ގަޑިތައް ކެންޑިޑޭޓުންނަށް އިލެކްޝަންސް ކޮމިޝަނުން އަންގަވަމުން ގެންދަވާނެ ކަމަށެވެ.

ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް އެއްދުވަހަކަށް އެންމެ ގިނަ ކެންޑިޑެންސީ ހުށައެޅީ ހޯމަ ދުވަހުގައެވެ. އެދުވަހު 115 މީހުން ކެންޑިޑެންސީ ހުށައެޅިއެވެ.

ރައްޔިތުންގެ މަޖިލީހުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ކަނޑައަޅާފައިވާ ތާރީޚަކީ މިއަންނަ މާރިޗު މަހުގެ 17 ވަނަ ދުވަހެވެ. އެހެން ނަމަވެސް މިހާރު ރައްޔިތުންގެ މަޖިލީހުން ފާސްކޮށްފައިވާ އާއްމު އިންތިޚާބާއި ބެހޭ ޤާނޫނަށް އިސްލާޙް ގެނައުމުގެ ބިލް، ޤާނޫނަކަށް ވުމުން އެ ތާރީޚް ބަދަލުވެގެންދާނެއެވެ.