މިއަހަރުގެ މާރިޗު 17 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު 2024 އަށް ވޯޓު ލުމަށް ރަޖިސްޓަރީ ކޮށްފައިވާ ފޮށީގެ ގޮތުން ވޯޓުގެ ސިއްރުކަން ގެއްލޭ މީހުން އަލުންް ރީރެޖިސްޓްރީވުމަށް އިލެކްޝަންސް ކޮމިޝަނުން ހުޅުވާލައިފިއެވެ.

އެކޮމިޝަނުން ބުނީ، ވޯޓުގެ ސިއްރުކަން ގެއްލޭ މީހުންގެ ލިސްޓް އެކޮމިޝަނުން މިހާރު އާއްމުކޮށްފައި ވާނެ ކަމަށެވެ. އެލިސްޓުގައި ވާގޮތުން، ޖުމުލަ 4651 މީހެއްގެ ވޯޓުގެ ސިއްރުކަން ގެއްލެއެވެ. އެގޮތަށް ދިމާވަނީ، އެމީހުން ރަޖިސްޓްރީވެފައިވާ ފޮއްޓަށް އެދާއިރާއިން ވޯޓުލާ އެހެން މީހަކު ނެތުމުންނެވެ.

އިލެކްޝަންސް ކޮމިޝަން ކޮމިޝަނުން ވިދާޅުވީ، ވޯޓުގެ ސިއްރުކަން ގެއްލޭ މީހުން، ވޯޓު ފޮށި ބެހެއްޓޭނެކަން ކަށަވަރުވެފައިވާ އެހެން ތަނަކަށް ރަޖިސްޓަރީ ކުރުމުގެ ފުރުޞަތު މާދަމާ ހަވީރު 04:00 ގެ ނިޔަލަށް ހުޅުވާލާފައިވާ ކަމަށެވެ. އަދި މި މުއްދަތުގެ ތެރޭގައި ރަޖިސްޓަރީ ވެފައިވާ ތަން ބަދަލުކުރެވޭނީ، އެ އިޢުލާނުގައިވާ ލިސްޓުގައި ހިމެނިފައިވާ ފަރާތްތަކަށް އެކަނި ކަމުގައިވެސް އިލެކްޝަންސް ކޮމިޝަނުން ވަނީ ހާމަކޮށްފައެވެ.

އަދި  އަލުން ރަޖިސްޓަރީ ވުމަށް އެދި ހުށަހަޅާނީ އޮންލައިންކޮށް https://form.elections.gov.mv އިލެކްޝަންސް ކޮމިޝަންގެ ރީ-ރަޖިސްޓްރޭޝަން ޕޯޓަލް މެދުވެރިކޮށް އެކަނި ކަމުގައިވެސް އެކޮމިޝަނުން ވަނީ ވިދާޅުވެފައެވެ.

އިލެކްޝަންސް ކޮމިޝަނުން ވިދާޅުވީ މިހާރު ދެވިފައިވާ، މި މުއްދަތުގެ ތެރޭގައި ރަޖިސްޓަރީ ބަދަލު ނުކޮށްފިނަމަ މި ފަރާތްތަށް ވޯޓުލުމަށް ރަޖިސްޓަރީ ވެފައިވާނީ މިހާރުވެސް ރަޖިސްޓަރީވެފައިވާ ތަނަށް ކަމަށެވެ.