ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި، ނައިބު ރައީސް ސަލީމްގެ އިތުބާރު ނެތްކަމުގެ މައްސަލަ ކުރިޔަށް ނުގެންދިޔުމަށް ނިންމައި އެމައްސަލަ އަނބުރާ ނަގައިފިއެވެ.

މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށައެޅި ސަރުކާރު ހިންގާ ޕާޓީ، ޕީއެންސީ އިންނެވެ. އެޕާޓީގެ މެމްބަރަކު ވިދާޅުވީ، މައްސަލަ އަނބުރާ ނަގާފައި ވަނީ މިއަދު ކަމަށާއި، އެ މައްސަލައިގައި ސޮއިކުރެއްވި ގިނަ މެމްބަރުންވެސް އަނބުރާ ސޮއެ ނަގާފައިވާ ކަމަށެވެ. އޭގެ ސަބަބަކީ، މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ މިވަގުތު ކުރިޔަށް ގެންދިޔުމަކީ އެންމެ ރަނގަޅުގޮތް ކަމަށް ނުފެންނާތީ ކަމުގައިވެސް އެ މެމްބަރުން ވިދާޅުވިއެވެ.

ރައްޔިތުންގެ މަޖިލީހުގައި ހިމެނޭ ސަރުކާރު ކޯލިޝަނަށް ނިސްބަތްވާ 23 މެމްބަރަކު ސޮއެކުރައްވައި ރައްޔިތުންގެ މަޖިލީހުގެ ރައީސާއި ނައިބުރައީސްގެ އިތުބާރުނެތްކަމުގެ މައްސަލަ މަޖިލީހަށް ހުށައެޅީ ހުސްވި ޖެނުއަރީ މަހުގެ 28 ވަނަ ދުވަހުގައެވެ. މިއަދު މައްސަލަ އަނބުރާ ނެގި އިރު މަޖިލީހުގައި އެމައްސަލަ ކުރިޔަށް ގެންދިޔުމަށް މަޖިލީހުގެ ރައީސާއި ނައިބު ރައީސަށް އޮތީ ނޯޓިސްވެސް ފޮނުވާފައެވެ.

މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ސަރުކާރު ކޯލިޝަނުން މަޖިލީހަށް ވެއްދި އިރު، މަޖިލީހުގެ ރައީސާއި ނައިބު ރައީސް މަޤާމުން ވަކިކުރެވޭނެ އަޣުލަބިއްޔަތެއް ސަރުކާރު ކޯލިޝަނަކަށް ނެތެވެ. އެމްޑީޕީއާ ޑިމޮކްރެޓްސް އާއެކުގައި މަޖިލީހުގެ ތެރޭގައި މަސައްކަތް ކުރަން ފަށާފައިވާއިރު، އެދެޕާޓީގައި 56 މެމްބަރުން ތިއްބަވައެވެ. ސަރުކާރަށް ތާއީދުކުރާ ތިއްބެވީ 24 މެމްބަރުންނެވެ. އަދި މަޖިލީހުގައި 6 ދާއިރާއެއްގެ ގޮނޑިތައް ހުސްވެފައިވާ އިރު މިދައުރުގައި އެގޮނޑިތަކަށް މެމްބަރުން އިންތިޚާބެއް ނުކުރާނެއެވެ.