މިއަދު މާލޭގައި އުސް ޢިމާރާތެއްގެ މަތިން ވެއްޓުނު މީހާއަކީ، އިންޑިއާ މީހެއް ކަމަށާއި އޭނާގެ ހާލު ސީރިއަސް ކަމަށް ފުލުހުންގެ އިދާރާއިން ބުނެފިއެވެ.

ފުލުހުންގެ އިދާރާއިން ބުނެފައި ވަނީ، އެމީހާ ވެއްޓިފައި ވަނީ މާލޭ ޗާނދަނީ މަގަށް ވާގޮތަށް ހުރި އިމާރާތެއްގެ 9 ވަނަ ފަންގިފިލާއިން ކަމަށާއި ސިޑި ގޮޅިން އޭނާ ވެއްޓިފައި ވަނީ އިމާރާތުގެ އެންމެ ތިރިއަށް ކަމަށެވެ.

މިއަދު 10:30 ހާއިރު ހިނގި މިހާދިސާގައި ޒަޚަމްވި މީހާއަކީ، 20 އަހަރުގެ އިންޑިއާ ރައްޔިތެއް ކަމަށެވެ. އެހެން ނަމަވެސް ހާދިސާ ހިނގަން މެދުވެރިވި ސަބަބެއް މިހާތަނަށް ފުލުހުން ހާމަކޮށްފައެއް ނުވެއެވެ.

މައުލޫމާތު އެނގޭ ބައެއް މީހުން ބުނެފައިވާ ގޮތުގައި އެމީހާވެއްޓުނީ އޭސީގެ މަސައްކަތެއް ކުރުމަށް އުޅުމުގެ ތެރޭގައެވެ. އެހެން ނަމަވެސް އެކަމާއި ގުޅޭ ގޮތުން މިހާތަނަށް ފުލުހުން އެއްޗެއް ބުނެފައެއް ނުވެއެވެ.

ފުލުހުންގެ އިދާރާއިން ބުނީ ހާދިސާ ހިނގިގޮތް ތަޙްޤީޤުކުރަމުންދާ ކަމަށެވެ.