ރައީސް މައުމޫނުގެ ޕާޓީ އެމްއާރްއެމް, އިލެކްޝަންސް ކޮމިޝަނުން އުވާލީ ޤާނޫނާއި ޚިލާފަށްކަން ކަނޑައަޅައި އެޕާޓީއަށް 50 ހާސް ރުފިޔާގެ ބަދަލެއް ދިނުމަށް ސިވިލްކޯޓުން ޙުކުމްކޮށްފިއެވެ.

ސިވިލްކޯޓުން މިހުކުމް ކުރެއްވީ، އެޕާޓީ އުވާލުމާއި ގުޅިގެން ސިވިލްކޯޓަށް ހުށައެޅި މައްސަލަ ބަލައި ނިންމުމަށްފަހުގައެވެ.

އެމްއާރްއެމް އުވާލުމަށް އިލެކްޝަންސް ކޮމިޝަނުން ނިންމި ނިންމުމަކީ، ޤާނޫނު އަސާސީގެ 43 ވަނަ މާއްދާގެ، (ހ) އާއި ސިޔާސީ ޕާޓީތަކުގެ ޤާނޫނުގެ 30 ވަނަ މާއްދާގެ (ހ)ގެ (1) އާ ޚިލާފު ނިންމުމެއްކަމަށް ސިވިލްކޯޓުން ވަނީ ކަނޑައަޅާފައެވެ.

އިިއްޔެ ސިވިލްކޯޓުން ކުރި ޙުކުމްގައި ބުނެފައި ވަނީ، ކޮންމެ ހަމަކުން އެއް ފަހަރު މެންބަރުންގެ އަދަދު ކަށަވަރުކޮށްދޭން ޖެހޭ ނޯޓިސް ދިނުމުގައި އަމަލުކުރަން ޖެހޭ ޒިންމާދާރު ގޮތަށް މާޒީގައި އިލެކްޝަން ކޮމިޝަންގެ ފަރާތުން ނުކޮށް ހުރި ކަމެއްގެ ގެއްލުމަކީ އެމްއާރްއެމް އިން އުފުލަން ޖެހޭ ގާނޫނީ މަސްއޫލިއްޔަތެއް ނޫން ކަމަށެވެ.

މީގެ އިތުރުން، އެމައްސަލައިގައި، މަދަނީ އިޖުރާޢަތުގެ ޤާނޫނުގެ 30، 270 އަދި 272 ވަނަ މާއްދާ އާއި ހަވާލާދީ، ޝަރީއަތުގެ ހަރަދުގެ ގޮތުގައި އެމްއާރްއެމްއިން ނަގައިދޭން އެދިފައިވާ، 50،000ރ 07 ދުވަސް ތެރޭގައި  ސިވިލްކޯޓަށް ދެއްކުމަށްވެސް އިލެކްޝަންސް ކޮމިޝަނުގެ މައްޗަށް ސިވިލްކޯޓުން ވަނީ ޙުކުމްކޮށްފައެވެ.