ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް، އިއްޔެއާ ހަމައަށް 183 މީހުން ކެންޑިޑެންސީ ހުށައަޅާފައިވާ ކަމުގައި އިލެކްޝަންސް ކޮމިޝަނުން ބުނެފިއެވެ.

އިއްޔެ އަކީ މިހާތަނަށް އެއްދުވަހެއްގައި އންމެ ގިނަ ކެނޑިޑޭޓުން އިންތިޚާބުގައި ވާދަކުރުމަށްޓަކައި ފޯމް ހުށައެޅި ދުވަހެވެ. އިއްޔެ އެކަނިވެސް 115 މީހުން ކެންޑިޑެންސީ ހުށައަޅާފައިވާ ކަމުގައި، އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވިއެވެ.

އިލެކްޝަންސް ކޮމިޝަނުން، ކެންޑިޑެންސީ ހުށައެޅުމަށް ދީފައިވާ ސުންގަޑި މާދަމާގެ މެންދުރުފަހު 14:00 އަށް ހަމަވާނެއެވެ.

ކެންޑިޑެންސީ ފޯމް އިލެކްޝަންސް ކޮމިޝަނުން ބަލައިގަންނަމުންދާނީ، މިއަދާއި މާދަމާ، ހެނދުނު 9:00 އިން މެންދުރުފަހު، 14:00އަށް ދަރުބާރުގޭގައި ޤާއިމްކޮށްފައިވާ އިންތިޚާބާއި ބެހޭ މައި މަރުކަޒުންނެވެ.

ރައްޔިތުންގެ މަޖިލީހުގެ އިންތިޚާބަށް އެންމެ ގިނަ ކެންޑިޑޭޓުން ފޯމް ހުށައަޅާފައި ވަނީ އިދިކޮޅު ޕާޓީ އެމްޑީޕީންނެވެ. އެޕާޓީގެ ފަރާތުން ރައްޔިތުންގެ މަޖިލީހުގެ 89 ދާއިރާއަކަށް ވާދަކުރައްވާ ކެންޑިޑޭޓުން އިއްޔެ ވަނީ ފޯމް ހުށައަޅާފައެވެ.