ބޭރު ފައިސާ ލިބުމުގައި ބޭންކަށް ދިމާވާ ދަތިތަކާ ގުޅިގެން ރުފިޔާ އެކައުންޓްތަކުން ބޭރުފައިސާގެ މުއާމަލާތް ކުރުމަށް މިހާރު ކަނޑައަޅާފައިވާ ކާޑު ލިމިޓްތައް މިދަނީ މުރާޖަޢާ ކުރަމުންކަމުގައި ބޭންކް އޮފް މޯލްޑިވްސްއިން ބުނެފިއެވެ.

ބޭންކްއޮފް މޯލްޑިވުސް އިން ބުނީ، ކާޑު ލިމިޓްތައް މިދަނީ މުރާޖަޢާ ކުރަމުން ދިޔަނަމަވެސް އަދި މިހާތަނަށް ބޭންކުން ވަކި ލިމިޓެއް ކަނޑަނާޅާ ކަމަށާއި، އަދި އައު ލިމިޓަކަށް އަމަލުކުރަން ފަށާނެ ތާރީހެއްވެސް ކަނޑަނާޅާކަމަށެވެ.

ޑޮލަރުގެ ތާށިކަން ދިމާވެ ބޭންކް އޮފް މޯލްޑިވްސްގެ ކާޑުތަކުން ބޭރު ގައުމުތަކުގައި ތިބެގެން މުއާމަލާތް ކުރެވޭ މިންވަރު 10 ޕަސެންޓު ކުޑަކުރަން ނިންމައިފައިވާ ކަމަށް ބައެއް ފަރާތްތަކުން ވަނީ ރިޕޯޓްކޮށްފައެވެ. 

ބޭރު ގައުމެއްގައި ބީއެމްއެލްގެ ޑެބިޓް ކާޑަކުން މިހާރު މުއާމަލާތް ކުރެވެނީ މަހަކު 250 ޑޮލަރާ ހަމައަށެވެ. ކްރެޑިޓް ކާޑަކުން މުއާމަލާތްކުރެވެނީ 750 ޑޮލަރާ ހަމައަށެވެ. ބޭންކުން ޑޮލަރު ލިމިޓަށް ބަދަލު ގެނައުމުން ދެން ޑެބިޓް ކާޑަކުން ނެގޭނީ 225 ޑޮލަރެވެ. އަދި ކްރެޑިޓް ކާޑަކުން 675 ޑޮލަރެވެ.

ބޭންކަށް ޑޮލަރު ތާށިކަމެއް އައިސްގެން އުޅެނީ ރަސްމީ ބޭންކިން ނިޒާމުގެ ތެރެއިން މާރުކުރާ ޑޮލަރުގެ އަދަދު މަދުވުމާ ގުޅިގެންކަމަށް މައުލޫމާތުލިބެއެވެ.