މިއަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި، އެމްޑީޕީގެ ޓިކެޓްގައި ވާދަކުރައްވާ ކެންޑިޑޭޓުން އެބޭފުޅުން ކެންޑިޑެންސީ މިއަދު އިލެކްޝަންސް ކޮމިޝަނަށް ހުށައަޅައިފިއެވެ.

އިލެކްޝަންސް ކޮމިޝަނަށް ކެންޑިޑެންސީ ހުށައެޅުމަށް ވަޑައިގެންފައި ވަނީ، އެކި ދާއިރާތަކުން ވާދަކުރައްވާ ކެންޑިޑޭޓުންނާއި އެބޭފުޅުންގެ އިންތިޚާބީ އޭޖެންޓުންނާއި އެކުގައެވެ. އަދި ކެންޑިޑެންސީ ހުށައެޅުމަށް ދިޔަ ކެންޑިޑޭޓުންނާއިއެކު އެމްޑީޕީގެ ޗެއަރޕަރސަން ފައްޔާޒު އިސްމާޢީލާއި ޕާޓީގެ އެހެން އިސްމަޤާމުތަކުގައި ތިއްބެވި ބޭފުޅުންވެސް ބައިވެރިވެވަޑައިގެންނެވިއެވެ.

މީގެ އިތުރުން އިއްޔެ، އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި، އެމްޑީޕީގެ އިސްބޭފުޅުން ވަނީ ހުރިހާ ކެންޑިޑޭޓުންނާއި ބައްދަލު ކުރައްވާފައެވެ.

ރައްޔިތުންގެ މަޖިލީހުގެ އިންތިޚާބުގައި މިފަހަރު 93 ދާއިރާއަކުން ކެންޑިޑޭޓުން ކުރިމަތިލައްވާއިރު، ހުރިހާ ދާއިރާއަކަށްވެސް ކެންޑީޑޭޓުން ނެރޭނެ ކަމުގައި އެމްޑީޕީން ވަނީ ބުނެފައެވެ.

ރައްޔިތުންގެ މަޖިލީހުގެ އިންތިޚާބުގައި ހުރިހާ ދާއިރާއަަކަށް ވާދަކުރަނީ، ޕީޕީއެމް ޕީއެންސީ ކޯލިޝަނުންނާއި، އެމްޑީޕީންނެވެ.

މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބު އަންނަ މާރިޗު މަހުގެ 17 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން ނިންމާފައި ވީނަމަވެސް، ރޯދަމަހު އިންތިޚާބުތައް ބޭއްވުން މަނާވާގޮތަށް އާއްމު އިންތިޚާބުތަކާއި ބެހޭ ޤާނޫނަށް ގެނައި އިސްލާޙް ރައްޔިތުންގެ މަޖިލީހުން ވަނީ އިއްޔެ ފާސްކޮށްފައެވެ.