ޓެކްސީ ޑްރައިވަރުންގެ ގައުމީ ދަފްތަރުގައި ރަޖިސްޓްރީވުމަށް ހުޅުވާލައިފިއެވެ. ޓްރާންސްޕޯޓް މިނިސްޓްރީން ބުނީ ރާއްޖޭގައި ޓެކްސީ ދުއްވާ މީހުންގެ ގައުމީ ދަފްތަރެއް އެކުލަވާލުމުގެ މަސައްކަތް ފަށާފައިވާ ކަމަށެވެ. އަދި އެ ދަފްތަރުގައި ޓެކްސީ ޑްރައިވަރުން ރަޖިސްޓަރީވުމަށް މިހާރު އާންމުކޮށް ހުޅުވާލާފައިވާކަމަށް އެ މިނިސްޓްރީން ކޮށްފައިވާ އިއުލާނުގައި ވަނީ ބުނެފައެވެ.

އެ ދަފްތަރުގައި ރަޖިސްޓަރީވުމަށް ބޭނުންވާ ޑްރައިވަރުން ޓްރާންސްޕޯޓް މިނިސްޓްރީގެ ސިމްސް ޕޯޓަލް މެދުވެރިިކޮށް، އެކަމަށް ހާއްސަކޮށްފައިވާ ފޯމް ފުރުމަށް ފަހު ހުށަހެޅުމަށް އެ އިއުލާނުގައިވެއެވެ.

މި ދަފްތަރު އެކުލަވާލުމާ ގުޅޭ މަޝްވަރާތައް މިދިޔަ މަހު ބޭއްވި ކެބިނެޓް ބައްދަލުވުމެއްގައި ވެސް ވަނީ ކޮށްފައެވެ. ޓެކްސީ ޑްރައިވަރުންނަށް ޑިޖިޓަލް ޕޭމެންޓްގެ ފަސޭހަ ނިޒާމެއް ހަމަޖައްސައިދިނުމާއި ބޭރު ގައުމުތަކުގައި ޓެކްސީ ހިދުމަތް ދޭ ގޮތަށް މި ދާއިރާއަށް ބަދަލުތައް ގެނައުމާއި ތިމާވެއްޓާ ރަށްޓެހި ޓެކްސީގެ ނިޒާމު ގާއިމްކުރުމާ ގުޅޭ ގޮތުން ވެސް އެ ބައްދަލުވުމުގައި ވަނީ މަޝްވަރާ ކޮށްފައެވެ.

ޓެކްސީ ޑްރައިވަރުންގެ ދަފްތަރެއް އެކުލަވާލުމަކީ މި ސަރުކާރުގެ ރިޔާސީ ވައުދެކެވެ. އަދި މި ދަފްތަރު ހަދައި ސޯޝަލް ހައުސިން ސްކީމްތަކާއި އެހެން ފުރުސަތުތައް ވެސް އެމީހުންނަށް ފަހިވާ ގޮތަށް ހަދައިދޭނެ ކަމަށް ރައީސް ކެމްޕެއިންގައި ވައުދުވެވަޑައިގެންނެވި އެވެ.