އެމްޕީއެލް އެފްއޭއެމް ދެވަނަ ޑިވިޝަނުގައި މިއަދު ކުޅުނު ފުރަތަމަ ސެމީ ފައިނަލް މެޗުގައި މަސްއޮޑި ސްޕޯޓްސް ކްލަބުން ޓެންޓް ސްޕޯޓްސް ކްލަބް 5-1 އިން ބަލިކޮށް، މުބާރާތުގެ ފައިނަލުން ޖާގަ ހޯދައިފިއެވެ. މިއާއެކު، ފުރަތަމަ ޑިވިޝަނަށް ޕްރޮމޯޓުވާނޭކަން އެ ޓީމަށް މި ވަނީ ކަށަވަރުވެފައެވެ.

ތިން ވަނަ ޑިވިޝަނުގެ ރަނާސްއަޕް ޓީމުގެ ގޮތުގައި ދެވަނަ ޑިވިޝަނަށް ޕްރޮމޯޓުވި މަސްއޮޑިއަށް މިއީ ތާރީހީ ސީޒަނެކެވެ. ދެވަނަ ޑިވިޝަނަށް އަލަށް އައިސް، މުޙައްމަދު އާތިފް (އާތީ) ގެ އިރުޝާދާއެކު ކުޅެމުން އަންނަ މަސްއޮޑި ޓީމުން މިވަނީ އެއްބުރުން ފުރަތަމަ ޑިވިޝަނަށް ވެސް ކޮލިފައިވެފައެވެ.

ފުރަތަމަ ޑިވިޝަނަށް ކޮލިފައިވާނީ ދެވަނަ ޑިވިޝަނުގެ ޗެމްޕިއަނުންނާއި ރަނާސްއަޕް ޓީމެވެ. ފުރަތަމަ ޑިވިޝަނަށް ޕްރޮމޯޓުވާނެ ދެވަނަ ޓީމެއް އެނގޭނީ، މާދަމާ ކުޅޭ ދެވަނަ ސެމީ ފައިނަލް މެޗަށްފަހުއެވެ. ރާއްޖޭގެ ފުޓުބޯޅައިގެ ބޮޑު ދެ ބާރު ކަމުގައިވާ ވިކްޓަރީ ސްޕޯޓްސް ކްލަބާއި ނިއުރޭޑިއަންޓް ސްޕޯޓްސް ކްލަބް ބައްދަލުކުރާ އެ މެޗު ފަށާނީ ހޯމަ ދުވަހުގެ ހަވީރު 3:30 ގައެވެ.

މިއަދުގެ މެޗުގައި ފުރަތަމަ ލީޑު ނެގީ މަސްއޮޑިންނެވެ. އެއީ މެޗުގެ 26 ވަނަ މިނެޓުގައި ހުސެއިން ޝަރީފް ކާމިޔާބުކުރި ގޯލެކެވެ. ނަމަވެސް ފުރަތަމަ ހާފު ނިމުމުގެ ކުރިން ޓެންޓުންވަނީ މެޗުގެ ނަތީޖާ ހަމަހަމަކޮށްފައެވެ. އެ ޓީމުގެ ސްރީލަންކާގެ ކުޅުންތެރިޔާ، ޗަލަނަ ޗަމީރާ މި ގޯލު ކާމިޔާބުކުރީ އިތުރު ވަގުތުގައެވެ.

ދެވަނަ ހާފުގައި މަސްއޮޑިން ވަނީ ހަތަރު ގޯލު ކާމިޔާބުކޮށްފައެވެ. އެ ގޯލުތައް ކާމިޔާބުކޮށްދިނީ އިސްމާއިލް ފިކްރީ އާއި އައްޒާމް އަބްދުﷲ (އެޑޫ) އާއި އަބްދުﷲ ޒިޔާން އަދި ބަދަލު ކުޅުންތެރިއެއްގެ ގޮތުގައި ކުޅެން ނިކުތް އަބްލާތީ އެލް ސައީދުއެވެ.