އެންޓި ކަރަޕްޝަން ކޮމިޝަނުން، ހައުސިންގ މިނިސްޓްރީ ފިޔަވައި އެއްވެސް ފަރާތަކަށް ފްލެޓްތަކުގެ ތަޙްޤީޤާއި ގުޅޭ މައުލޫމާތު ލިޔުމުން ދީފައި ނުވާނެ ކަމަށާއި، މިހާރު ދައުރުކުރަމުން ދަނީ އެކޮމިޝަނުން ތައްޔާރުކޮށްފައިވާ ލިސްޓެއް ނޫންކަމުގައި އޭސީސީން ބުނެފިއެވެ.

އޭސީސީން ބުނީ، ގެދޮރުވެރިޔާ ސްކީމްގެ ދަށުން، ފްލެޓް ދޫކުރުމާއި ގުޅޭ ގޮތުން، ތަޙްޤީޤުކުރަމުންދާ މައްސަލައިގައި، އެކޮމިޝަނުން ތައްޔާރުކޮށްފައިވާ ލިސްޓެއްކަމަށް ބުނެ، ސޯޝަލް މީޑިއާގައި ދައުރުކުރަމުން ދަނީ އެކޮމިޝަނުން ތައްޔާރުކޮށްފައިވާ ލިސްޓެއް ނޫންކަމަށެވެ. އަދި އެމައްސަލަ އާއި ގުޅޭ ގޮތުން، ކޮމިޝަނުގެ ތަޙްޤީޤަށް ހޯދިފައިވާ ހޯދުންތަކުގެ މައްޗަށް ބިނާކޮށް، ތަޙްޤީޤުގެ ބޭނުމަށް ތައްޔާރުކޮށްފައިވާ ލިސްޓެއްގެ މައުލޫމާތު، މިހާތަނަށް ކޮމިޝަނުން ޙިއްޞާކޮށްފައި ވަނީ، އެމައްސަލަ ރައްދުވާ، މިނިސްޓްރީ އޮފް ހައުސިންގ ލޭންޑް އެންޑް އަރބަން ޑިވެލޮޕްމެންޓުގެ އިތުރުން، ކޮމިޝަންގެ ޤާނޫނުގެ 1-28ވަނަ މާއްދާއިން ޖަވާބު ދާރީވާންޖެހޭ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއާ އެކަނި ކަމުގައިވެސް އޭސީސީން ވަނީ ބުނެފައެވެ.

އޭސީސީގެ ލިސްޓްކަމަށް ބުނެ، ސޯޝަލް މީޑިއާގައި ވަނީ، ލިސްޓެއް އާއްމުކޮށްފައެވެ. އެކަމާއި ގުޅިގެން އޭސީސީން ނެރުނު ބަޔާނުގައި ބުނީ، ކޮމިޝަނުގެ އެއްވެސް މަސައްކަތަކަށް އެއްވެސް މީހެއްގެ ނުވަތަ އެއްވެސް ފަރާތެއްގެ އެއްވެސް ނުފޫޒެއް ނުފޯރާނެ ކަމުގެ ޔަޤީންކަން ދިވެހި ރައްޔިތުންނަށް އަރުވާކަމަށެވެ. އަދި ކޮމިޝަނުގެ އެންމެ މަތީ މަސްލަޙަތަކީ، ޤާނޫނު ނަގަހައްޓައި، ރައްޔިތުންގެ މަސްލަޙަތު ޙިމާޔަތްކުރުން ކަމުގެ ކަށަވަރުކަންވެސް ރައްޔިތުންނަށް ދޭ ކަމަށެވެ.