އަލިރަސްގެފާނުގެ ޖިހާދު މިއަދު ސިޔާސީ މީހުންނާއި، މީޑިއާ އާއި ޒުވާނުންނާއި އެބަ މުޚާތަބުކުރާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ރާއްޖޭގައި ފާހަގަކުރާ ދިވެހިރާއްޖޭގެ 46 ވަނަ ޝަހީދުންގެ ދުވަހުގެ މުނާޞަބަތުގައި ޤައުމާއި މުޚާޠަބު ކުރައްވައި ދެއްވި ޚިޠާބުގައެވެ.

ދިވެހިރާއްޖޭގެ ޝަހީދުންގެ ދުވަހުގެ ގޮތުގައި ފާހަގަކުރަނީ، ހިޖުރީ ކަލަންޑަރުން ކޮންމެ އަހަރެއްގެވެސް ޝަޢުބާން މަހުގެ 1 ވަނަ ދުވަހެވެ. އެދުވަހަކީ، ދިވެހިތަޚުތުގައި ރެނދަލި ކުރެއްވި އައްސުލްޠާން ޢަލީ 6 ވަނަ، ޕޯޗްގީޒުންނާއި ހަނގުރާމަކުރައްވައި ޝަހީދުވެވަޑައިގެންނެވި ދުވަހެވެ.

ޝަހީދުންގެ ދުވަހުގެ ޒިކުރާ އާއި، އަލި ރަސްގެފާނުގެ ޖިހާދުގެ ޒިކުރާ އައު ކުރައްވައި ރައީސުލްޖުމްހޫރިއްޔާ ދެއްވި ޚިޠާބުގައި ވަނީ، ތާރީޚީގޮތުން އެހާދިސާ ހިނގައި ދިޔަ ގޮތުގެ މައްޗަށް އަލިއަޅުއްވައިލައްވާފައެވެ. އަދި ކަޅުމުޙައްމަދު ރަސްގެފާނާއި، އެރަސްގެފާނުގެ ދަރިކަލުން އައްސުލްޠާން ޙަސަން 9ވަނަ، ދިވެހިޤައުމަށް ވެވަޑައިގެންނެވި ޚިޔާނާތުގެ މައްޗަށްވެސް އެމަނިކުފާނުގެ ޚިޠާބުގައި އަލިއަޅުއްވައި ލެއްވިއެވެ.

ރައީސުލްޖުމްހޫރިއްޔާގެ ޚިޠާބުގައި ވިދާޅުވީ، ޢަލި ރަސްގެފާނުގެ ޖިހާދު އަދުގެ ސިޔާސީ ފަރާތްތަކާއި އެބަ މުޚާތަބުކޮށް، ބޭރުގެ ދަހިވެތި ފަރާތްތަކުގެ ފައިބުޑަށް ތިރިނުވުމަށް ގޮވާލާ ކަމަށާއި، ދިވެހިންގެ ސަލާމަތް ދިވެހިން، ހޯދުމަށް އެބަ ގޮވާލާ ކަމަށެވެ. އަދި އަލި ރަސްގެފާނު މީޑިއާއާއިވެސް އެބަ މުޚާތަބު ކުރާ ކަމަށާއި، މިގޮތުން ޚަބަރު ފަތުރާއިރު ޤައުމާއި އެއްކޮޅަށް ޚަބަރުތައް ގެންނަން އެބަ ނަޞޭހަތްދޭކަމަށާއި ދޮގު ޚަބަރުތައް ނުފަތުރަން އެބަ އިންޒާރުދޭ ކަމުގައިވެސް ރައީސް ވިދާޅުވިއެވެ. މީގެ އިތުރުން އެމަނިކުފާނު ވިދާޅުވީ، ޢަލި ރަސްގެފާނުގެ ޖިހާދު ދިވެހި ޒުވާނުންނާއިވެސް އެބަ މުޚާތަބުކުރާ ކަމަށާއި، ޒުވާންކަމުގެ އޮއެވަރުގައި އަމިއްލަ ދީން، އަމިއްލަ ޤައުމު ފަހަނައަޅައި ނުދާން އެބަ ނަޞޭހަތްތެރިވާ ކަމަށެވެ. 

ރައީސުލްޖުމްހޫރިއްޔާގެ ޚިޠާުބު ނިންމަވާލައްވަމުން މިސަރުކާރުން، ދިވެހި ކަނޑުން ގެއްލުނު ބައި އަނބުރާ ހޯދާނެ ކަމަށާއި، ދިވެހި ބިމަކީ ބޭރުގެ އަސްކަރީ ބާރުތަކަށް ޖާގަނެތް ބިމެއް ކަމުގައި ހަދާނެ ކަމަށެވެ. އަދި އަމިއްލަ ފަސްގަނޑު އެބައެއްގެ އަތުގައި ނެތް ޤައުމުތަކުގެ މީހުންގެ ޙާލު އަދުގެ ދުނިޔޭގައި ފެންނަމުންދާ ކަމަށާއި، ފަލަސްޠީނަކީ އޭގެ މިސާލެއްކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވަނީ، ޝަހީދުންގެ ދުވަހުގެ ޚިޠާބުގައި، ދީނަށް ހުރުމަތްތެރިކޮށް ހިތުމަށާއި، ދައުލަތަށް ވަފާތެރިވުމަށް، އަދި ދަރީންގެ ކިބައިގައި އެސިފަތައް ހަރުލެއްވުމަށް އިލްތިމާސްކުރައްވާފައެވެ.