ދެވަނަ ޑިވިޝަން ފުޓުބޯޅަ މުބާރާތުގެ ކުއާޓާ ފައިނަލްގައި މިދިޔަ ބުދަ ދުވަހު ވިކްޓަރީ ސްޕޯޓްސް ކްލަބާއި ކުޑަ ހެންވޭރު ޔުނައިޓެޑް ބައްދަލުކުރި މެޗުގައި ހިނގާދިޔަ ހަމަނުޖެހުންތަކާ ގުޅިގެން 2 މީހަކު ހައްޔަރުކޮށްފިއެވެ. 

ކްރިމިނަލް ކޯޓުގެ އަމުރުގައިވާ ގޮތުން މި މައްސަލައިގައި ހައްޔަރުކޮށްފައިވަނީ ހ. ހިލްޓަން، އިބްރާޙިމް އަލީފް ރައޫފް އަދި ގދ. ތިނަދޫ/ފައިވްރޯސް ރިކްޒު އާދަމްއެވެ. އަދި އެ 2 މީހުންގެ ބަންދަށް ކްރިމިނަލް ކޯޓުން 15 ދުވަސް ޖަހާފައިވެއެވެ. 

ބުދަ ދުވަހުގެ މެޗުގައި މަސްލަހަތު ގޯސްވެ ހަމަނުޖެހުން ހިނގަން ފެށުނީ މެޗު ނިމެން 7 މިނެޓަށް ވެފައިވަނިކޮށެވެ. އޭރު ވިކްޓަރީ އޮތީ 3-1 ގެ ލީޑެއްގައެވެ. މި ހަމަނުޖެހުން ފެށުނީ ވިކްޓަރީގެ ބެންޗާ ދިމާލުން އެ ޓީމުގެ އަނަޓޮލީ ގަސްތުގައި ކުޑަ ހެންވޭރު ޔުނައިޓެޑްގެ ހާޒިމް ރިއްފަތު ގައިގައި ފައިން ޖެހުމުންނެވެ. 

ހަމަނުޖެހުންތަކާ ގުޅިގެން މެޗު މެދުކަނޑާލާފައި ގިނަ ވަގުތުތަކެއް ވަންދެން އޮތުމަށްފަހު، މެޗު އޮފިޝަލުން ނިންމީ މެޗުގެ ބާކީ ވަގުތު ކުޅުމާމެދު ފަހުން ގޮތެއް ނިންމުމަށެވެ. އެފްއޭއެމްގެ ޑެޕިޔުޓީ ޖެނަރަލް ސެކްރެޓަރީ އަބްދުﷲ ޝިބާއު ވިދާޅުވީ މެޗާ މެދު ގޮތް ނިންމާނީ އިމަޖެންސީ ކޮމިޓީން ކަމަށެވެ.

އަދި އެއަށްފަހު މެޗުގެ ބާކީ އޮތްބައި ޖެހިގެން އައި ހުކުރު ދުވަހުގެ ހަވީރު ކުޅުމަށް އެފްއޭއެމް އިން ނިންމުމުން، ކުޑަހެންވޭރު ޔުނައިޓެޑުން ވަނީ މެޗުގެ ބާކީބައި އެ ޓީމުން ކުޅެން ބޭނުންނުވާކަމަށް ބުނެފައެވެ.