މާލޭގެ މަގުމަތީގައި ހަމައެއް ލަމައެއްނެތި ހަތަރު ފުރޮޅުލީ އުޅަނދު ޕާކުކުރުން މިހާރު އާންމު ކަމަކަށްވެފައި ވާއިރު، ކުރީގެ ފަސްޓް ލޭޑި ފަޒްނާ އަޙުމަދު އެކަމަށް ފާޑު ވިދާޅުވެއްޖެއެވެ.

ސޯޝަލް މީޑިއާގައި މެޑަމް ފަޒްނާ ކުރެއްވި ޕޯސްޓެއްގައި ވިދާޅުވެފައިވާ ގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދެއް ފުއްދުމުގެ ބޭނުމުގައި، އެމީހަކު ކުރާނެ ގޮތަކަށް ޕާކު ކުރަން ދޫކޮށްލާފައި އޮތުމުން، ގާނޫނާ ޚިލާފު ސަގާފަތެއް މިހާރު ދަނީ އާންމުވަމުންނެވެ.

މެޑަމް އިތުރަށް ފާހަގަ ކުރެއްވި ގޮތުގައި، މަގުތަކުގެ އަރިމަތީގައި މީހުން ހިނގުމަށް ހާއްސަކޮށްފައިވާ ޕޭމަންޓުތަކުގަ އާއި ހާއްސަ އެހީއަށް ބޭނުންވާ މީހުންނަށް ހިނގަން ފަސޭހަ ކުރުމަށް ބައެއް މަގުތަކުގައި ހަދާފައިވާ ""ޓެކްޓައިލް ޕޭވިން" މަތީގައި ވެހިކަލްތައް ޕާކު ކުރަމުންދާތީ، ހިނގާބިނގާވެ އުޅޭ މީހުންނަށް މިކަމުގެ ސަބަބުން ދަނީ ބޮޑެތި ދަތިތަކާ ކުރިމަތިވަމުންނެވެ.

އާންމުންނަށް މިހާ ބޮޑު އުނދަގުލެއް ކުރިމަތިވާ ކަމެއްގައި މިހާބޮޑަށް ސަރުކާރުން އިހުމާލުވެފައިވަނީ ކީއްވެތޯ ވެސް މި ޕޯސްޓުގައި މެޑަމް ސުވާލުކޮށްފައިވެއެވެ.

"މި ގޮތަށް މިކަން ހިނގުމަށް ދޫކޮށްލާފައި މިއޮތީ ކީއްވެބާއެވެ؟ ބެލެވޭ ގޮތުގައި މިއީ މާލެގައި ޕާކު ކުރުމަށް ޖާގަ ނެތުމުން"، އިނގިރޭސި ބަހުން މެޑަމް ލިޔުނު ބަސްކޮޅުގައި ވެއެވެ.

އަދި އެއަށްފަހު މަޖާޒީ ގޮތަކަށް ވިދާޅުވެފައިވަނީ، މި ގޮތަށް އަމަލު ކުރުމަށް ދޫކޮށްލާފައި މިއޮތީ، އެއީ މިހާރުގެ ގަވާއިދުތަކާ އުސޫލުތަކުގައި އޮންނަ ގޮތަކީ އެއީ ކަމުގައި ވާތީތޯއެވެ.

ހަތަރު ފުރޮޅުލީ އުދަނޑުގެ އިތުރުން ދެ ފުރޮޅުލީ އުޅނދުތައް ވެސް މިހާރު މަގުގެ ދެ ފަރާތުގައި ޕާކު ކުރެއެވެ. މިކަމުގެ ސަބަބުން މިގުތައް ހުއްޓުމަކަށް އަންނަ ފަހަރުތައް ވެސް މިހާރު މާލޭގައި ގިނައެވެ. މިކަން މިހާބޮޑަށް އާންމުވާން ފެށި، ޕާކިން ވައިލޭޝަން ސްޓިކަރ ޖެހުން ފުލުހުން ހުއްޓާލުމުންނެވެ.