ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ އެކްސްޓްރާ އޯޑިނަރީ ކޮންގްރެސް މިއަދު ބާއްވައިފިއެވެ.

މިއަދު ބޭއްވި ކޮންގްރެސްގެ ފުރަތަމަ ޖަލްސާއަށް ކޯރަމް ހަމަވެފައެއް ނުވެއެވެ. އެ ޖަލްސާގެ ކޯރަމް ހަމަކުރުމަށް 13 ކްލަބަކުން ހާޒިރުވާން ޖެހޭއިރު، ހާޒިރުވެފައިވަނީ 9 ކްލަބަކުންނެވެ. 

މިކަމާ ގުޅިގެން އެފްއޭއެމްގެ އެކްޓިން ޖެނަރަލް ސެކްރެޓަރީ މުހައްމަދު ޖައުޝަން ޝަރީފް ވިދާޅުވީ، ކޮންގްރެސްގެ ފުރަތަމަ ޖަލްސާގައި ކޯރަމް ހަމަނުވުމުން، އަސާސީ ގަވާއިދުގެ ދަށުން ދެވަނަ ޖަލްސާއެއް 24 ގަޑިއިރުތެރޭގައި ބޭއްވޭނެ ކަމަށެވެ. އެ ޖަލްސާގައި ކޯރަމް ހަމަވުން ލާޒިމު ނޫންކަމަށް އޭނާ ވިދާޅުވިއެވެ.

އެހެންކަމުން އޭގެ 15 މިނެޓުފަހުން އިތުރު ކޮންގްރެސްއެއް ބާއްވައި، އެފްއޭއެމްގެ ކޮމެޓީތައް ވަނީ ފާސްކޮށްފައެވެ.

މިއަދު ބޭއްވި ކޮންގްރެސްގައި އެފްއޭއެމްގެ އިލެކްޓޯރަލް ކޮމެޓީއާއި، އިލެކްޓޯރަލް އެޕީލް ކޮމެޓީ އަލުން އެކުލަވާލުމާއި، އެފްއޭއެމްއާ ގުޅޭ މައްސަލަތައް ބެލުމަށް ހާއްސަކޮށް އުފައްދާފައިވާ ޑިސިޕްލިނަރީ ކޮމެޓީ އަދި އެތިކްސް ކޮމެޓީ ވަނީ އެކުލަވާލާފައެވެ.

އެފްއޭއެމް އިދާރީ ގޮތުން ހިންގުމުގައި ހުންނަންޖެހޭކަމަށް އަސާސީ ގަވާއިދުގައި ލާޒިމްކުރާ ކޮމެޓީތައް ނެތްކަން ފާހަގަވީ އެފްއޭއެމްގެ ރައީސްކަމަށް ކުރިމަތިލާފައިވާ އެ އިދާރާގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙުމަދު ޠާރިގު (ޓޮމް)ގެ ކެނޑިޑެސީ ސައްހަ ނޫންކަމަށް އެފްއޭއެމްގެ އިލެކްޓޯރަލް ކޮމެޓީއިން ނިންމުމުން، މި ނިންމުން އަލުން ދިރާސާ ކުރުމަށް ހުށަހެޅުމުންނެވެ. މި މައްސަލަ ކުރިޔަށް ނުދިޔައީ އެފްއޭއެމްގެ އިލެކްޓޯރަލް ކޮމެޓީއެއް ނެތުމުންނެވެ.

އެފްއޭއެމްގެ ރައީސް ހޮވުމަށް މިދިޔަ ޖެނުއަރީ މަހުގެ 31 ގައި ބޭއްވުމަށް މަސައްކަތްކުރި އިންތިހާބުގެ ކަންތައްތަކުގައި ބޮޑެތި މައްސަލަތައް ކުރިމަތިވެ، އަދި އެ މައްސަލަތައް ބަލާ އެކަންކަމަށް ހައްލު ހޯދުމަށް ކުރިމަތިވެފައި އޮތް ގޮންޖެހުންތައް ހައްލު ކުރެވޭނެ މަގެއް ހޯދުމަށް އެފްއޭއެމް އޮތީ ނުކުޅެދިފައެވެ. އެގޮތުން އެފްއޭއެމް އިދާރީ ގޮތުން ހިންގުމުގައި ހުންނަންޖެހޭކަމަށް އަސާސީ ގަވާއިދުގައި ލާޒިމްކުރާ ކޮމެޓީތައް އެކުލަވާލުމާއި، އުސޫލާ ޚިލާފަށް ބައެއް ކޮމެޓީތައް އެކުލަވާލާފައިވާތީ އެކަން އިސްލާހު ކުރުމާއި އަދި ބައެއް ކޮމެޓީތަކުގެ މެމްބަރުން އިސްތިއުފާ ދިނުމުގެ ސަބަބުން ކޮމެޓީތައް ހަރަކާތްތެރިވުމަށް ކުރިމަތިވެފައިވާ އިދާރީ ގޮންޖެހުންތައް ހައްލުކުރުމަށް، މާޒިޔާ ސްޕޯޓްސް އެންޑް ރިކްރިއޭޝަން ކްލަބުން ހިށަހެޅީ މިދިޔަ މަހުގެ މެދުތެރޭގައެވެ.