Advertisement
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ---
އުނދަގޫ، ދަތި، އިޤްތިޞާދީ ފިޔަވަޅުތައް އަޅަނީ، ރައްޔިތުންގެ ޙައްޤުގައި - ރައީސް
އުނދަގޫ، ދަތި، އިޤްތިޞާދީ ފިޔަވަޅުތައް އަޅަނީ، ރައްޔިތުންގެ ޙައްޤުގައި ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެންވިދާޅުވީ، އިއްްޔެ ކޮޅުމަޑުލަށް ފެއްޓެވި ރަސްމީ ދަތުރުފުޅުގެ ތެރެއިން މިއަދު، ކޮޅުމަަޑުލު ކަނޑޫދޫއަށްވަޑައިގެން، އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ އިއްޔެ ކޮޅުމަޑުލުގެ ރަށްރަށަށް ފެއްޓެވި ދަތުރުފުޅުގައި ކޮޅުމަޑުލު ގުރައިދޫ އާއި ދިޔަމިގިލީގައި ދެއްކެވި ވާހަކަފުޅުގައި ރާއްޖެއަށް ކުރިމަތިވަމުން އަންނަ އިޤުތިޞާދީ ދަތިކަމުގެ ވާހަކަ ޚާއްޞަ ގޮތެއްގައި ފާހަގަކުރެއްވިއެވެ. ރައީސުލްޖުމްހޫރިއްޔާގެ ވާހަކަފުޅުގައި، އިޤުތިޞާދީ ދަތިތަކުން އަރައިގަތުމަށް ސަރުކާރުން މުހިއްމު ގިނަ މަސައްކަތްތަކެއް ކުރައްވަމުންގެންދަވާކަން ވަނީ ފާހަގަކުރައްވާފައެވެ. މިގޮތުން ރާއްޖޭގެ އިޤުތިޞާދު ހަމަ މަގަށް އެޅުވުމަށް މިސަރުކާރުން ކުރަމުން އަންނަ މަސައްކަތްތައް ރަނގަޅުކަން ބޭރުގެ މާލީ އިދާރާތަކުން ފާހަގަކޮށްފައިވާ ކަމުގައިވެސް ރައީސުލްޖުމްހޫރިއްޔާ ވަނީ، ރަށްރަށުގައި ދެއްކެވި ވާހަކަފުޅުގައި ފާހަގަކުރައްވާފައެވެ.
ކަނޑޫދޫގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ، އިޤުތިޞާދީ ދަތިތަކުން އަރައިގަނެ ރަށްރަށުގެ ތަރައްޤީއަށް ކުރަން ހުރި މަސައްކަތްތައް ކޮށްދެއްވާނޭ ކަމުގައި ވިދާޅުވެފައެވެ.
ރައީސުލްޖުމްހޫރިއްޔާ އިއްޔެ ގުރައިދޫގައި ދެއްކެވި ވާހަކަފުޅުގައި ވަނީ، ކުރިޔަށް އޮތް ދެމަހުގައި އިޤުތިޞާދީ ގޮތުން ދަތި ޙައްސާސް ދުވަސްވަރަކަށް ވެގެން ހިނގައިދާނެކަން ފާހަގަކުރައްވައި އެކަން ރައްޔިތުން ޤަބޫލުކުރެއްވުމަށް އެދިވަޑައިގަންނަވާފައެވެ. އަދި އިޤުތިޞާދީ ޙާލަތު ރަނގަޅުވުމާއި އެކު، ރަށްރަށުގެ މަޝްރޫޢުތައް ފައްޓަވާނެ ކަމުގައިވެސް ވިދާޅުވިއެވެ.
މިއަދު ރައީސުލްޖުމްހޫރިއްޔާ ވަޑައިގެން ރައްޔިތުންނާއި ބައްދަލުކުރެއްވި ރަށްރަށުގައި، އެރަށްރަށުގެ އުމުރާނީ އަދި އިޤުތިޞާދީ ތަރައްޤީއަށް ކުރެއްވުމަށް ސަރުކާރުން ވަޢުދުވިކަންކަން ކޮށްދެއްވާނެ ކަމުގެ ޔަޤިންކަން ވަނީ ދެއްވާފައެވެ.
