ގަތަރުގައި މިހާރު ކުރިޔަށްދާ އޭޝިއަން ކަޕްގެ ފައިނަލުގެ ފުރަތަމަ ޖާގަ ޖޯޑަންއިން ކަށަވަރުކޮށްފިއެވެ. ފީފާ ރޭންކިންގައި ޖޯޑަންއަށް ވުރެން ބޮޑު ތަފާތަކުން ކުރީގައި އޮތް ސައުތު ކޮރެއާގެ މައްޗަށް އެ ޓީމުން ސެމީ ފައިނަލްގައި ކާމިޔާބު ހޯދީ 2-0 އިންނެވެ.

މިއީ ޖޯޑަން މި މުބާރާތުގެ ފައިނަލް ކުޅޭނެ ފުރަތަމަ ފަހަރެވެ. އެ ޓީމުން މީގެ ކުރިން  މި މުބާރާތުގެ ސެމީ ފައިނަލަށް ވެސް ދަތުރުކޮށްފައެއް ނުވެއެވެ.

ގަތަރުގެ އަޙްމަދު ބިން ޢަލީ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި އެއްވެސް ގޯލެއް ފެނިގެން ގޮސްފައެއް ނުވެއެވެ. ނަމަވެސް ޖޯޑަންއިން ވަނީ ނުރައްކާތެރި ހަމަލާތަކެއް ކޮރެއާގެ ގޯލަށް އަމާޒުކޮށް ފޮނުވާލާފައެވެ. ފުރަތަމަ ހާފުގައި ކޮރެއާއަށް މާ މޮޅު ކުޅުމެއް ނުދެއްކުނުތާގަ، މުޅި މެޗުގައި ޖޯޑަންގެ ގޯލަށް އެއްވެސް ހަމަލާއެއް އަމާޒު ކުރެވިފައެއް ނުވެއެވެ.

ޖޯޑަންގެ ފުރަތަމަ ގޯލު ފެނިގެން ދިޔައީ މެޗުގެ 53 ވަނަ މިނެޓުގައެވެ. އެއީ މޫސާ ޓަމާރީ ފަހިކޮށްދިން ފުރުސަތަކުން، ޖޯޑަންގެ ހުނަރުވެރި ކުޅުންތެރިޔާ ޔަޒާން އަލް-ނައިމަތު ކާމިޔާބުކުރި ގޯލެކެވެ. އޭގެ 13 މިނެޓު ފަހުން ޖޯޑަން އިން ލީޑު ފުޅާކުރިއެވެ. މި ގޯލު ކާމިޔާބު ކޮށްދިނީ މޫސާ ޓަމާރީއެވެ.

މި ދެ ޓީމަކީ ވެސް ގްރޫޕް-އީގައި ހިމެނުނު ދެ ޓީމެވެ. ގްރޫޕް ސްޓޭޖުގައި މި ދެ ޓީމު ބައްދަލުކުރި މެޗު ވަނީ 2-2 އިން އެއްވަރުވެފައެވެ.

މި މުބާރާތުގެ ތަފާސް ހިސާބުތައް ދައްކާގޮތުން، މޫސާ ޓަމާރީ މިވަގުތު ހުރި ފޯމަކީ، ފައިނަލުގައި އެ ޓީމާ ދެކޮޅަށް ކުޅޭނެ ޓީމަކަށް އޮންނާނެ އެންމެ ބޮޑު އެއް ނުރައްކަލެކެވެ. ކޮރެއާ ކޮޅަށް އޭނާ ޖެހި ގޯލާއި ހެދި އެސިސްޓާއެކު، މިހާތަނަށް ޖުމްލަ 4 ގޯލާއި 3 އެސިސްޓްކޮށްދީފައި ވެއެވެ. މީގެ އިތުރުން އަލް-ނައިމަތު ވަނީ ކޮރެއާގެ ގޯލަށް 6 ހަމަލާ ފޮނުވާލާފައެވެ.  

ސެމީ ފައިނަލްގެ ދެވަނަ މެޗުގައި މިއަދު ބައްދަލުކުރާނީ ގަތަރާއި އިރާންއެވެ. މި މެޗު ފަށާނީ ރާއްޖެ ގަޑިން 20:00 ގައެވެ.