މިދިޔަ މަހުގެ 29 ވަނަ ދުވަހު ރައްޔިތުން މަޖިލީހުން ރުހުން ނުދިން ތިން ވަޒީރުން ހަމަ އެދުވަހު މަޤާމަށް ޢައްޔަނުކުރުމަށްފަހުގައި، އެބޭފުޅުންނަށް ރުހުން ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ރައްޔިތުންގެ މަޖިލީހަށް އެބޭފުޅުންގެ ނަންތައް ފޮނުއްވައިފިއެވެ.

ޖެނުއަރީ މަހުގެ 29 ވަނަ ދުވަހު ބޭއްވި ރައްޔިތުންގެ މަޖިލީހުގައި، ރުހުން ނުދިން 3 ވަޒީރުންނަކީ، ބަންޑާރަ ނައިބު އަޙްމަދު އުޝާމާއި، މިނިސްޓަރ އޮފް އިސްލާމިކް އެފެއާޒް، ޑރ. މުޙައްމަދު ޝަހީމް ޢަލީ ސަޢީދާއި، ހައުސިން މިނިސްޓަރ ޑރ. ޢަލީ ޙައިދަރެވެ.

މިތިން ބޭފުޅުންނަށް ރައްޔިތުންގެ މަޖިލީހުން ރުހުން ނުދިނުމުން، އޭގެ ދެތިންގަޑިއިރު ފަހުން ހަމަ އެދުވަހު، ރައީސް ޑރ. މުޢިއްޒު ވަނީ އެތިން ބޭފުޅުން، ކުރިން ތިއްބެވި ވުޒާރާތަކަށް އަލުން ޢައްޔަނުކުރައްވައި މަޤާމުގެ ފަތްކޮޅު ދެއްވާފައެވެ. މަޖިލީހުން ރުހުން ނުދެއްވި ތިން މިނިސްޓަރުން ހަމަ އެމިނިސްޓްރީތަކަށް ރައީސުލްޖުމްހޫރިއްޔާ އަލުން ޢައްޔަނުކުރެއްވުމަކީ، ޤާނޫނު އަސާސީގެ ރޫޙާއި ޙިލާފަށް ކުރެއްވި ކަމެއް ކަމުގައި ރައްޔިތުންގެ މަޖިލީހުގެ މެމްބަރުންނާއި ޤާނޫނީ ދާއިރާގެ ބޭފުޅުން ވަނީ ވިދާޅުވެފައެވެ.

ބަންޑާރަ ނައިބު އަޙްމަދު އުޝާމަށް ރުހުން ނުދިނުމަށް މަޖިލީހުން ފާސްކުރީ މަޖިލީހުގެ ބޮޑު އަޣުލަބިއްޔަތަކުންނެވެ. މިގޮތުން އުޝާމަށް ރުހުންދޭން ފެންނަކަމަށް 24 މެމްބަރުން ވޯޓު ދެއްވި އިރު، ރުހުން ނުދޭން ފާސްވީ 44 މެމްބަރުންގެ ވޯޓުންނެވެ.

އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދަށް ރުހުން ނުލިބުނީ 1 ވޯޓުގެ ތަފާތުންނެވެ. ޝަހީމަށް ރުހުންދޭން ފެންނަކަމަށް 30 މެމްބަރުން ވޯޓު ދެއްވިއިރު ރުހުންދޭން ނުފެންނަކަމަށް، 31 މެމްބަރުން ވޯޓު ދެއްވިއެވެ.

މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، ޑރ. ޢަލީ ހައިދަރަށް ރުހުން ނުދޭން ފާސްކުރީވެސް ސާފު އަޣުލަބިއްޔަތުންނެވެ. މިގޮތުން ޑރ. ޢަލީ ހައިދަރަށް ރުހުން އޮތް ކަމަށް 24 މެމްބަރަކު ވޯޓު ދެއްވި އިރު، ރުހުން ދޭން ނުފެންނަކަމަށް، 46 މެމްބަރަކު ވޯޓު ދެއްވިއެވެ.

ރައްޔިތުންގެ މަޖިލީހުން ރުހުން ނުދިން ވަޒީރުން ހަމައެދުވަހު އަލުން މަޤާމަށް ޢައްޔަނުކުރައްވައި، މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ އެބޭބޭފުޅުންގެ ނަންތައް އަލުން މަޖިލީހަށް ފޮނުއްވުމަކީ ޤާނޫނު އަސާސީގެ ޙުރުމަތް ކަނޑާލުން ކަމުގައިވެސް ރައްޔިތުންގެ މަޖިލީހުގެ އިދިކޮޅު މެމްބަރުން ވަނީ ވިދާޅުވެފައެވެ.