ބިންވެރިޔާ ސްކީމްގެ ދަށުން ގޯތި ލިބިފައިވާ މީހުންނަށް ރެޖިސްޓްރީ ދޫކުރުމުގެ މަސައްކަތް މިއަދު އަލުން ފަށާނެ ކަމުގައި ހައުސިން މިނިސްޓްރީން ވިދާޅުވެއްޖެއެވެ.

ހައުސިން މިނިސްޓްރީން ނެރުނު ނޫސް ބަޔާނުގައި ވިދާޅުވީ، ގޯތި ލިބިފައިވާ ފަރާތްތަކަށް، ގޯތި ލިބުނު ކަމުގެ ލިޔުމާއި ގޯތި ރެޖިސްޓަރީ ހަވާލު ކުރުން ކުރިއަށް ގެންދާނީ އަންނަ ބުދަ ދުވަހުން ފެށިގެން ރަސްމީ ކޮންމެ ދުވަހެއްގެ މެންދުރު 2:00 އިން ފެށިގެން އިރުއޮއްސި 6:00 އާ ދެމެދު އެމިނިސްޓްރީން ކަމަށެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުން މާލޭގެ ބޯހިޔާވަހިކަމުގެ މައްސަލައަށް ހައްލު ހޯދުމުގެ ގޮތުން ބިންވެރިޔާ ސްކީމްގެ ދަށުން، ހުޅުމާލެއާއި ގުޅީފަޅު އަދި ގިރާވަރު ފަޅުން ބިން ހިއްކައިގެން ޖުމުލަ 9003 ގޯތި ދޫކުރުމަށް ވަނީ ނިންމާފައެވެ. އެގޮތުން ހުޅުމާލެއިން 1351 ގޯއްޗާއި ގުޅީފަޅުން 2219 ގޯތީގެ އިތުރުން ގިރާވަރުފަޅުން ދޫކުރާ 5433 ގޯތި ލިބޭ ފަރާތްތަކަށް ކަނޑައަޅައި އެފަރާތްތަކަށް ގޯތި ލިބުނު ކަމުގެ ލިޔުމާއި ރެޖިސްޓްރީ ހަވާލުކޮށް، ބިން ކަނޑައި ދިނުމުގެ މަސައްކަތް ސަރުކާރު ބަދަލުވުމާއި ހަމައަށް ކުރިޔަށް ގެންދިޔައެވެ.

މިސަރުކާރު ފެށުނު ފަހުންވެސް ގޯތި ލިބިފައިވާ ބައެއް ފަރާތްތަކަށް ބިން ކަނޑައިދިން ނަމަވެސް، ގޯތި ލިޔުމާއި ރަޖިސްޓްރީ ދޫކުރުން މިހާތަނަށް އޮތީ ހުއްޓާލާފައެވެ.