ރޯދަމަހުގެ ފަހު 10 ދުވަށް ރަސްމީ ބަންދު ދުވަސްތަކެއްގެ ގޮތުގައި ކަނޑައަޅުއްވައި ސަރުކާރުގެ އިދާރާތަކުން ރައްޔިތުންނަށް އެދުވަސްތަކުގައި ކޮންމެހެން ދޭންޖެހޭ ޚިދުމަތްތައް ދޭނެ ގޮތުން އިންތިޒާމްތައް ހަމަޖެއްސެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ރަމަޟާން މަހުގެ ފަހު ދިހައިގެ ދުވަސްތައް ރަސްމީ ބަންދު ދުވަސްތަކެއް ކަމުގައި، ހަމަޖެއްސެވީ، ރާއްޖޭގައި އިސްލާމީ އުޞޫލުތައް ޤާއިމުކުރުމާއި، ދީނީ ކަންކަމަށް އިސްކަންދިނުމަށް ފުރުޞަތު ދެއްވުމުގެ ގޮތުން، ރަމަޟާން މަހުގެ ފަހުދިހައިގެ ދުވަސްތައް ބަންދުކުރެއްވުމަކީ، މި ސަރުކާރުގެ ރިޔާސީ ވަޢުދަކަށްވާތީ ކަމަށެވެ.

އަދި ރަމަޟާން މަހުގެ ފަހުދިހަޔާ ގުޅިގެން ސަރުކާރު ބަންދުވާ ދުވަސްތަކުގައި، އެކިއެކި މުއައްސަސާތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، އެ މުއައްސަސާތަކުން ކަނޑައަޅާ ގޮތެއްގެ މަތިން ދެއްވުމުގެ އިންތިޒާމު ހަމަޖެއްސެވުމަށާއި، އެ ޚިދުމަތްތައް ދެއްވުމަށް ހަމަޖެހިފައިވާ ގޮތުގެ ތަފްޞީލް، އެކި ވަސީލަތްތައް މެދުވެރިކުރައްވައި، ރައްޔިތުންނަށް ވީހާވެސް ބޮޑަކަށް ސާފުކޮށްދެއްވައި، އެކަންކަމުގެ މަޢުލޫމާތު، ރައީސުލްޖުމްހޫރިއްޔާގެ އޮފީހާ ޙިއްޞާކޮށްދެއްވުމަށް، މުއައްސަސާތަކާއި ކުންފުނިތަކާއިއެކު ރައީސުލްޖުމްހޫރިއްޔާގެ އޮފީހުން ބޭއްވި ބައްދަލުކުރުން ތަކުގައި އެދިފައިވާ ކަމަށެވެ. 

ރަމަޟާން މަހުގެ ފަހު ދިހައެއްގެ ބަންދާއި އެކު، މާރިޗު 31 އިން އޭޕްރީލް 13 އަށް މެދު ނުކެނޑި 14 ދުވަސް ސަރުކާރު ބަންދުވާނެއެވެ.