ފަލަސްޠީނުގެ ޣައްޒާއަށް އިޒްރޭލުގެ ހަައްދުފަހަނަ އެޅި ސިފައިން ދޭންފެށި ހަމަލާތަކާއި ގުޅިގެން، ރާއްޖޭގެ މިސްކިތްތަކުގައި ފަރުޟު ނަމާދުތަކުގައި ކިޔަންފެށި ޤުނޫތުއްނާޒިލާ ކިޔުން ހުއްޓާލަށް މިނިސްޓްރީ އޮފް އިސްލާމިކް އެފެއާޒުން އަންގައިފިއެވެ.

ޤުނޫތު ނާޒިލާ ކިޔަން ފަށާފައި ވަނީ، އޮކްޓޫބަރު މަހުން ފެށިގެންނެވެ. އިސްލާމިކް މިނިސްޓްރީން ފޮނުވި ސާކިއުލާގައި ވާގޮތުން ޤުނޫތު ކިޔުން ހުއްޓާލާނީ މިރޭގެ މަޣުރިބު ނަމާދުން ފެށިގެންނެވެ. އެހެންނަމަވެސް މި ނިންމުން ނިންމި ސަބަބެއް އެމިނިސްޓްރީން ހާމަކޮށްފައެއް ނުވެއެވެ.

އެހެން ނަމަވެސް އެކަމާއި ގުޅޭ ގޮތުން އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު އެކްސްގައި ކުރެއްވި ޕޯސްޓުގައި ވިދާޅުވީ، ޤުނޫތުއް ނާޒިލާއަކީ، ދާއިމީކޮށް ފަރުޟު ނަމާދުގައި ކިޔަންޖެހޭ އެއްޗެއް ނޫން ކަމަށެވެ.

ފަލަސްޠީނުގެ ގާޒާ އަށާއި، ހުޅަނގު އައްސޭރީގައި އިޒްރޭލު ސިފައިން ދީފައިވާ ހަމަލާތަކުގައި މިހާތަނަށް ވަނީ 27000 ވުރެ ގިނަ މީހުން ޝަހީދުވެފައެވެ. އޭގެ ތެރޭގައި 18000 ވުރެ ގިނަ ކުޑަކުދިން ހިމެނެއެވެ. އިޒްރާއީލުން ވަނީ ރޭވެސް ރަފަހްގެ ރެފިއުޖީ ކޭމްޕަކަށް ހަމަލާދީފައެވެ.

އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރާއީލުން ދަނީ އެމެރިކާގެ މަދަދާއި އެކު ހުއްޓާ ނުލައި ބޮންއަޅަމުންނެވެ. އަދި އެއްގަމު މަގުން ގާޒާއަށް ވަތް އިޒްރާއީލު ސިފައިން 3 މަސް ދުވަސް ފަހުން މިހާރު ގާޒާއިން ފައިބައިފައި ވާއިރު، އިޒްރޭލު ސިފައިންގެ އެތައް ބަޔަކު މަރުވެ އިޒްރޭލަށް ވަނީ ނާކާމިޔާބީއާ ކުރިމަތިލާންޖެހިފައެވެ. ޤަތަރުމެދުވެރިވެގެން ހަމަލާތައް ބަދަލުކުރުން ހުއްޓާލުމުގެ ވާހަކަތައް ޙަމާސް އާއި އެކު ކުރިޔަށް ގެންދިޔުމަށް އިޒްރާއީލުން މިހާރު ދަނީ މަސައްކަތް ކުރަމުންނެވެ.