އޭޝިއަން ކަޕް ކުއާޓާ ފައިނަލްގެ ތިން ވަނަ މެޗުގައި އިރާނާއި ޖަޕާނު ބައްދަލުކުރި މެޗުގައި އިރާނަށް އިތުރު މިނެޓުގައި ލިބުނު ޕެނަލްޓީ ކާމިޔާބުކޮށް، އެ ޓީމުން ފަހަތުން އަރައި ޖަޕާނު ބަލިކޮށްފިއެވެ.

އޭޝިއަން ކަޕްގައި މި ދެ ޓީމުން ނެރެފައިވާ ނަތީޖާތަކަށް ބަލައި، މި މެޗަކީ މުބާރާތުގެ ފައިނަލާ ނުލައި ދެން ކުޅޭނެ އެންމެ ފޯރިގަދަ މެޗުކަމަށް ގަބޫލުކުރެވިފައި އޮތެވެ. ކަންވީ ވެސް އެހެންނެވެ. 1960 އާއި 1970ގެ އަހަރުތަކުގެ ތެރޭގައި ޖެހިޖެހިގެން 3 ފަހަރަށް މުބާރާތް ކާމިޔާބުކުރި އިރާނުން މެޗު އަނބުރާލީ އިތުރު މިނެޓުގައެވެ. 1992 ވަނަ އަހަރުގެ ފަހުން މުބާރާތް 4 ފަހަރު ކާމިޔާބުކޮށްފައިވާ ޖަޕާނަށް ޖެހުނީ މުބާރާތާއި އަލްވަދާއު ކިޔާށެވެ.

ގަތަރުގެ އެޑިއުކޭޝަން ސިޓީ ސްޓޭޑިއަމްގައި ކުޅުނު މި މެޗުގައި ޖަޕާނުން ލީޑު ނެގީ 28 ވަނަ މިނެޓުގައި އެ ޓީމުގެ މެދު ތެރެއަށް ކުޅޭ ހިޑެމާސާ މޮރީޓާ ކާމިޔާބުކުރި ގޯލަކުންނެވެ. އަދި އޭގެ ފަހުން ލީޑު ފުޅާ ކުރާނެ ފުރުސަތުތަކެއް ޖަޕާނަށް ލިބިގެން ދިޔައެވެ. ނަމަވެސް އެއްވެސް ފުރުސަތެއް ކާމިޔާބު ކުރެވޭނެ ގޮތެއް ނުވިއެވެ.

އިރާނުން މެޗުގެ ނަތީޖާ ހަމަހަމަކުރީ، 55 ވަނަ މިނެޓުގައި މުހައްމަދު މޮހޭބީ ކާމިޔާބުކުރި ގޯލަކުންނެވެ. އަދި ސެމީގެ ޖާގަ އެ ޓީމުން ކަށަވަރުކުރީ، އިތުރު މިނެޓުގައި ޖަޕާނުގެ ޕެނަލްޓީ އޭރިއާ ތެރެއަށް ހުރަސް ކުރި ބޯޅައެއް، ޖަޕާނުގެ ދެ ޑިފެންޑަރުންނަށް ރަގަޅަށް މުއާމަލާތް ނުކުރެވި ލަސްވެ، ބޯޅަ ސާފު ނުކޮށްލެވުމުން އެ ބޯޅަ ހޯދަން މަސައްކަތްކުރި އިރާނުގެ ސެންޓްރަލް ޑިފެންޑަރަށް ކުރި ފައުލަކާ ގުޅިގެން ލިބުނު ޕެނަލްޓީއަކުންނެވެ.

އޭޝިއަން ކަޕްގެ ތާރީހުގައި އިރާނުގެ ސަޕޯޓަރުން މީގެ ފަހުން އަބަދުވެސް ހަނދާން ހުންނާނެ މި ޕެނަލްޓީ ކާމިޔާބުކޮށްދިނީ އަލީރިޒާ ޖަހަންބަކްޝްއެވެ. އަދި އޭގެ 3 މިނެޓުފަހުން ރެފްރީ ފުމެލި ކަށިގަނޑާއެކީ، ޖަޕާނުން އަނބުރާ ގައުމަށް ދިއުމަށް ތައްޔާރުވާން ޖެހުނެވެ.

ކުއާޓާ ފައިނަލްގެ ފަހު މެޗުގައި، މުބާރާތް ބާއްވާ ގަތަރުން ވަނީ އުޒްބެކިސްތާނު ބަލިކޮށްފައެވެ. މެޗުގެ ފުރިހަމަ ވަގުތު ކުޅެވުނު އިރު ނަތީޖާ ހަމަހަމަވެފައި ވުމުން، އިތުރު ވަގުތު ކުޅުނެވެ. ނަމަވެސް އިތުރު ވަގުތުގެ ދެ ހާފުން ވެސް ނަތީޖާ ކަނޑަނޭޅުމުން، ދެން ޖެހުނީ ޕެނަލްޓީ ޖަހާށެވެ. ޕެނަލްޓީ ޝޫޓްއައުޓްގައި އިރާނުން ވަނީ 3 ޕެނަލްޓީ ކާމިޔާބުކޮށްފައެވެ. އުޒްބެކިސްތާނަށް ކާމިޔާބު ކުރެވުނީ 2 ޕެނަލްޓީއެވެ.

މުބާރާތުގެ ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ ފެބުރުވަރީ 6 އަދި 7 ގައެވެ. ފުރަތަމަ މެޗުގައި ބައްދަލު ކުރާނީ ޖޯޑަން އާއި ސައުތު ކޮރެއާއެވެ. އަދި ދެވަނަ މެޗުގައި އޮންނާނީ އިރާނާއި ގަތަރުގެ ކުރިމަތިލުމެކެވެ.