ދަ ޑިމޮކްރެޓްސް އިން ވިހި ވަނަ މަޖިލީހުގައި ވާދަކުރާ ދެ ދާއިރާއަކަށް އެއް ކެނޑިޑޭޓަށް ވުރެން ގިނަ ކެނޑިޑޭޓުން ވާދަކުރުމަށް ހުށަހަޅާފައިވާތީ، އެ ދެ ދާއިރާއިން ކުރިމަތިލާނެ ބޭފުޅަކު ކަނޑައެޅުމަށް މިއަދު ބޭއްވި އެ ޕާޓީގެ ޕްރައިމަރީ ކާމިޔާބުކުރެއްވީ ސައިފްއާ ފިރުޝާންއެވެ.

ނަވާރަ ވަނަ  މަޖިލީހުގައި މަޑަވެލި ދާއިރާގެ ގޮނޑި ފުރުއްވަމުން ގެންވަދާ ފިރުޝާން މިއަދުގެ ޕްރައިމަރީ ކާމިޔާބުކޮށް، މިފަހަރު ވާދަކުރައްވަން ނިންމާފައިވަނީ ހުޅުމާލެ ދެކުނު ދާއިރާއަށެވެ. މި ދާއިރާގައި ވާދަކޮށްފައިވަނީ ދެ ކެނޑިޑޭޓުންނެވެ. އަދި މި ދާއިރާގެ ޓިކެޓު ފިރުޝާން ކާމިޔާބު ކުރެއްވީ 74 ވޯޓު ހޯއްދަވައިގެންނެވެ.

ހެންވޭރު ދެކުނު ދާއިރާއަށް ވެސް ކުރިމަތިލާފައިވަނީ ދެ ކެނޑިޑޭޓުންނެވެ. މިދިޔަ ޖެނުއަރީ މަހު ބޭއްވި މާލޭ ސިޓީ މޭޔަރުކަމުގެ ބައި-އިލެކްޝަންގައި ވެސް ވާދަކުރި، ދަ ޑިމޮކްރެޓްސްގެ ސައިފް ފާތިޙް ވަނީ ޖުމްލަ 27 ވޯޓުގެ ތެރެއިން 15 ވޯޓު ހޯދާ، ޓިކެޓު ކަށަވަރުކޮށްފައެވެ.

ޕްރައިމަރީގައި ވާދަކުރުމަށް ދަ ޑިމޮކްރެޓްސްއިން ހުޅުވާލި ފުރުސަތުގައި 41 ދާއިރާއަކަށް ކެނޑިޑޭޓުންވަނީ ކުރިމަތިލާފައެވެ. އަދި އޭގެ ތެރެއިން ޕްރައިމަރީއަކާ ނުލައި 39 ދާއިރާއެއްގެ ޓިކެޓު ވަނީ ކަށަވަރުވެފައެވެ.

އެ ޕާޓީން ހާމަކޮށްފައިވާ ގޮތުގައި ޕްރައިމަރީއަށް ކުރިމަތިލުމަށް ހުޅުވާލި ފުރުސަތުގައި އެއްވެސް ކެންޑިޑޭޓަކު އެކަމަށް އެދި ހުށަހަޅާފައިވާ ނުވާ ދާއިރާތަކަށް ޝައުގުވެރިވާ ފަރާތްތަކަށް އިތުރު ފުރުސަތެއްގެ ވަނީ ދީފައެވެ. އެގޮތުން، ޝައުގުވެރިކަންފާޅުކޮށް ހުށަހެޅުމުގެ ސުންގަނޑި އެއްކަމަށް ކަނޑައަޅާފައިވަނީ 6 ފެބްރުއަރީ 2024 ވާ އަންގާރަ ދުވަހުގެ 18:00 ގެ ނިޔަލަށެވެ. މި ދާއިރާތަކަށް އެއް ކެނޑިޑޭޓަށް ވުރެން ގިނަ ކެނޑިޑޭޓުން ކުރިމަތިލި ނަމަވެސް، ވަގުތު ނެތުމާއެކު ޕްރައިމަރީއަކާ ނުލައި ޓިކެޓު ހަވާލުކުރާނެ ފަރާތެއް ކަނޑައެޅުމަށް ހަމަޖެހިފަނީ ޕާޓީ ރައީސްގެ ކައުންސިލުންނެވެ.