މިއަހަރުގެ ޙައްޖުގައި ހިލޭ ސާބަހަށް މަސައްކަތް ކޮށްދޭނެ މީހުން ހޯދުމަށް ޙައްޖު ކޯޕަރޭޝަނުން އިއުލާންކޮށްފިއެވެ.

ޙައްޖު ކޯޕަރޭޝަނުން ވިދާޅުވީ ހިލޭ ސާބަހަށް މަސައްކަތް ކޮށްދޭނެ 30 ވަރަކަށް މީހުން ބޭނުންވާނެ ކަމަށެވެ. އަދި މިހާރު ވަކިއަދަދެއް ކަނޑައަޅާފައި ނުވަނީ އިތުރު ޙައްޖު ކޯޓާ ހޯދުމުގެ މަސައްކަތް ކުރަމުން އަންނާތީ އެހީތެރިންގެ ގޮތުގައި އިތުރު މީހުން ބޭނުންވާނެތީ ކަމަށް ޝަކީލް ވިދާޅުވިއެވެ.

ޙައްޖުގައި އެހީތެރިންގެ ގޮތުގައި ދާން ބޭނުންވާ މީހުން އެކަމަށް އެދި މިމަހުގެ 13 ވަނަދުވަހުގެ 14:00ގެ ކުރިން ހުށައަޅަންޖެހެއެވެ. އެކަމަށް އެދި ހުށައަޅާނީ ޙައްޖު އަދި ޢުމްރާ ދަތުރުތަކުގައި ހިލޭސާބަހަށް މަސައްކަތްކޮށްދިނުމަށް އެދި ހުށަހަޅާ ފޯމު މެދުވެރިކޮށެވެ. މި ފޯމް ޙައްޖު ކޯޕަރޭޝަންގެ ވެބްސައިޓުން ލިބެން ހުންނާނެއެވެ.

ޙައްޖު ކޯޕަރޭޝަނުން ވިދާޅުވީ މިމަގާމަށް ބޭނުންވަނީ އަސާސީ ތައުލީމު ހާސިލްކޮށްފައިވާ އަދި ގިނަ ވަގުތު މަސައްކަތުގައި އުޅެވޭ ސިއްހަތު ރަނގަޅު މީހުންކަމަށެވެ. އަދި މިމަޤާމަށް މީހުން ހޮވުމުގައި ޢަރަބި ބަސް ނުވަތަ އުރުދޫ ބަހުން މުޢާމަލާތްކުރަން އެނގޭ، ޙައްޖު އަދި އުމްރާގެ މަސައްކަތުގެ ދާއިރާއިން ތަޖުރިބާ ލިބިފައިވާ ފަރާތްތަކަށް އިސްކަންދޭނެކަމަށްވެސް ޙައްޖު ކޯޕަރޭޝަނުން ވިދާޅުވެއެވެ.