މިއަދު ބޭއްވި އެމްޑީޕީގެ މަޖިލިސް ޕްރައިމަރީގައި ހުޅުމާލެ ދެކުނު ދާއިރާގެ ޓިކެޓް އެދާއިރާއަށް ވާދަ ކުރައްވި ޑރ. އަޙްމަދު ޝަމްހީދު ކާމިޔާބު ކުރައްވައިފިއެވެ.

މިއިންތިޚާބުގައި އެދާއިރާގެ ވޯޓުލުން ކުރިޔަށް ގެންދިޔައީ، ހުޅުމާލެ ޤާސިމް ޕްރީ ސްކޫލުގައެވެ. ޑރ. ޝަމްހީދަށް 187 ވޯޓު ލިބުނު އިރު ދެން ވާދަކުރެއްވި ޙުސައިން ނަޒީފަށް ލިބިވަޑައިގަތީ 123 ވޯޓެވެ. 

ހުޅުމާލެ ދެކުނު ދާއިރާގެ އެމްޑީޕީގެ ޓިކެޓް، ޑރ. އަޙްމަދު ޝަމްހީދު ކާމިޔާބު ކުރެއްވި އިރު، މިއަދު ދަ ޑިމޮކްރެޓްސްއިން ބޭއްވި ޕްރައިމަރީގައި އެދާއިރާގެ ޑިމޮކްރެޓްސްގެ ޓިކެޓް ކާމިޔާބު ކުރެއްވީ، ޙުސައިން ފިރުޝާންއެވެ.

އެހެން ކަމުން ރައްޔިތުންގެ މަޖިލީހުގެ އިންތިޚާބުގައި ހުޅުމާލެ ދެކުނު ދާއިރާއަށް ވާދަކުރައްވާނެ ކެންޑިޑޭޓުން މިހާރު ވަނީ ޔަޤީންވެފައެވެ. އެދާއިރާއަށް ވާދަކުރައްވާނީ، އެމްޑީޕީން ޑރ. އަޙްމަދު ޝަމްހީދާއި، ދަ ޑިމޮކްރެޓްސްއިން ޙުސައިން ފިރުޝާން އާއި، ޖުމްހޫރީ ޕާޓީން އައިޝަތު ނަޙްލާގެ އިތުރުން ޕީޕީއެމް ޕީއެންސީ ކޯލިޝަންގެ ފަރާތުން ވާދަކުރާ ކެންޑިޑޭޓެވެ.

ރައްޔިތުންގެ މަޖިލީހުގެ އިންތިޚާބު އޮންނާނީ، މިއަންނަ މާރިޗު މަހުގެ 17 ވަނަ ދުވަހުގައެވެ.