މި އަންނަ މާޗު މަހު ބޭއްވުމަށް ހަމަޖެހިފައިވާ ވިހި ވަނަ ރައްޔިތުންގެ މަޖިލީހުގެ ޕްރައިމަރީގައި ވާދަކުރުމަށް ދަ ޑިމޮކްރެޓްސްއިން ހުޅުވާލި ފުރުސަތުގައި، އެއް ކެނޑިޑޭޓަށް ވުރެން ގިނަ ކެނޑިޑޭޓުން ކުރިމަތިލި ދާއިރާތަކުގައި ބައްވާ، އެ ޕާޓީގެ މަޖިލިސް ޕްރައިމަރީ އިންތިހާބު ފެށިގެން ކުރިޔަށް އެބަދެއެވެ.

ޑިމޮކްރެޓްސްގެ މަޖިލިސް ޕްރައިމަރީ ކުރިޔަށް ގެންދަނީ ޖުމްލަ ދެ ދާއިރާއެއްގެއެވެ. އެއީ ހެންވޭރު ދެކުނު ދާއިރާ އާއި ހުޅުމާލެ ދެކުނު ދާއިރާގެއެވެ. ހެންވޭރު ދެކުނު ދާއިރާގައި ދެ ކެނޑިޑޭޓަކު ވާދަކުރާއިރު ހުޅުމާލެ ދެކުނު ދާއިރާގައި ތިން ކެނޑިޑޭޓަކު ވާދަކުރެއެވެ.

މިއަދުގެ ހެނދުނު 9:00 އިން ފެށިގެން ހަވީރު 4:00 އާ ހަމައަށް ކުރިޔަށް ގެންދާ މި އިންތިހާބުގެ ވޯޓުލުން ކުރިޔަށްދަނީ ދެ މަރުކަޒެއްގައެވެ. އެގޮތުން ހެންވޭރު ދެކުނު ދާއިރާގެ ވޯޓު ފޮށި ބަހައްޓާފައިވަނީ ހައުސް އޮފް ޑިމޮކްރެޓްސް (ހަރުގެ)ގައެވެ. އަދި  ހުޅުމާލެ ދެކުނު ދާއިރާގެ ވޯޓު ފޮށި ބަހައްޓާފައިވަނީ ބްރައިޓްވޭ އިންޓަނޭޝަނަލް ސްކޫލް (ގޭޓް 3، ގުލްޗަމްޕާ މަގު)، ހުޅުމާލޭގައެވެ.

ރައްޔިތުންގެ މަޖިލީހުގެ ޕްރައިމަރީގައި ވާދަކުރުމަށް ދަ ޑިމޮކްރެޓްސްއިން ހުޅުވާލި ފުރުސަތުގައި އެކަމަށް ހުށަހަޅި ކެނޑިޑޭޓުންގެ އަދަދަށް ބަލައި، އެންމެ ފުރަތަމަ 4 ދާއިރާއެއްގައި ޕްރައިމަރީ ބޭއްވުމަށް އޮތީ ހަމަޖެހިފައެވެ. ނަމަވެސް ކެލާ ދާއިރާއާއި ކަނޑިތީމު ދާއިރާގެ ތެރެއިން ކޮންމެ ދާއިރާއަކަށް ކުރިމަތިލި ދެ ކެނޑިޑޭޓުންގެ ތެރެއިން އެއް ކެނޑިޑޭޓަކު ނަން ނެގުމާ ގުޅިގެން، މި ދެ ދާއިރާގެ ޓިކެޓު ވަނީ ކަށަވަރުވެފައެވެ.

ޕްރައިމަރީގައި ވާދަކުރުމަށް ދަ ޑިމޮކްރެޓްސްއިން ހުޅުވާލި ފުރުސަތުގައި 41 ދާއިރާއަކަށް ކެނޑިޑޭޓުންވަނީ ކުރިމަތިލާފައެވެ. އަދި އޭގެ ތެރެއިން ޕްރައިމަރީއަކާ ނުލައި 39 ދާއިރާއެއްގެ ޓިކެޓު ވަނީ ކަށަވަރުވެފައެވެ.

އެ ޕާޓީން ހާމަކޮށްފައިވާ ގޮތުގައި ޕްރައިމަރީއަށް ކުރިމަތިލުމަށް ހުޅުވާލި ފުރުސަތުގައި އެއްވެސް ކެންޑިޑޭޓަކު އެކަމަށް އެދި ހުށަހަޅާފައިވާ ނުވާ ދާއިރާތަކަށް ޝައުގުވެރިވާ ފަރާތްތަކަށް އިތުރު ފުރުސަތެއްގެ ވަނީ ދީފައެވެ. އެގޮތުން، ޝައުގުވެރިކަންފާޅުކޮށް ހުށަހެޅުމުގެ ސުންގަނޑި އެއްކަމަށް ކަނޑައަޅާފައިވަނީ 6 ފެބްރުއަރީ 2024 ވާ އަންގާރަ ދުވަހުގެ 18:00 ގެ ނިޔަލަށެވެ. މި ދާއިރާތަކަށް އެއް ކެނޑިޑޭޓަށް ވުރެން ގިނަ ކެނޑިޑޭޓުން ކުރިމަތިލި ނަމަވެސް، ވަގުތު ނެތުމާއެކު ޕްރައިމަރީއަކާ ނުލައި ޓިކެޓު ހަވާލުކުރާނެ ފަރާތެއް ކަނޑައެޅުމަށް ހަމަޖެހިފަނީ ޕާޓީ ރައީސްގެ ކައުންސިލުންނެވެ.