ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީން އެޕާޓީގެ ފަރާތުން ރައްޔިތުންގެ މަޖިލީހުގެ އިންތިޚާބުގައި ވާދަކުރާނެ ކެނޑިޑޭޓުން ކަނޑައެޅުމަށްޓަކައި ބާއްވާ ޕްރައިމަރީ ގެ ވޯޓުލުން ފަށައިފިއެވެ.

އެމްޑީޕީން ހާމަކޮށްފައިވާ ގޮތުގައި ޕްރައިމަރީގެ ވޯޓުލުން ކުރިޔަށްދާނީ މިއަދު ހެނދުނު، 9:00 އިން ފެށިގެން ހަވީރު 5:00އަށެވެ. މިއަދުގެ އިންތިޚާބުގައި ރައްޔިތުންގެ މަޖިލީހުގެ 40 ދާއިރާއަކަށް އެމްޑީޕީން ވާދަކުރާނެ ކެންޑިޑޭޓުން ކަނޑައެޅިގެންދާނެއެވެ. މި ޕްރައިމަރީގައި 149 ކެންޑިޑޭޓުން ވާދަކުރާއިރު، 25325 މީހުންނަށް ވޯޓު ދިނުމުގެ ހައްޤު ލިބިގެންވާ ކަމުގައި އެމްޑީޕީން ވަނީ ބުނެފައެވެ.

އެމްޑީޕީގެ ޕްރައިމަރީގެ ވޯޓުލުން ބޭއްވުމަށް، މުޅި ރާއްޖޭގައި އެޕާޓީން ވަނީ، 132 ވޯޓުފޮށި ވަނީ ބަހައްޓާފައެވެ، އޭގެ ތެރޭގައި ހިމެނެނީ، މާލޭގައި ވޯޓު ލުމަށް ބަހައްޓާފައިވާ، 27 ފޮއްޓާއި އަތޮޅުތަކުގައި ވޯޓުލުމަށް ބަހައްޓާފައިވާ 95 ވޯޓުފޮއްޓެވެ.

އެމްޑީޕީގެ ޕްރައިމަރީ 53 ދާއިރާއެއްގައި ނުބާއްވައެވެ. އޭގެ ތެރެއިން 5 ދާއިރާއަކީ އެއްވެސް ކެންޑިޑޭޓަކު ޕްރައިމަރީއަށް ކުރިމަތި ނުލައްވާ 5 ދާއިރާއާއި އެންމެ ކެންޑިޑޭޓެއް ކުރިމަތިލުމުގެ ސަބަބުން ޕްރައިމަރީ ނުބާއްވާ 48 ދާއިރާއެވެ. އެހެންވެ ޕްރައިމަރީއަކާއި ނުލައި އެމްޑީޕީގެ ފަރާތުން މަޖިލިސް އިންތިޚާބުގައި ވާދަކުރުމަށް ޝައުޤުވެރިކަން ފާޅުކުރި 48 ބޭފުޅަކަށް ވަނީ މިހާރު، ޕާޓީގެ ޓިކެޓް ލިބިފައެވެ. އެމްޑީޕީން ބުނީ، މާރިޗު 17 ގައި ބާއްވާ ރައްޔިތުންގެ މަޖިލީހުގައި އިންތިޚާބީ ހުރިހާ ދާއިރާއަކަށްވެސް އެޕާޓީގެ ކެންޑިޑޭޓުން ވާދަކުރާނެ ކަމަށެވެ. މިއަހަރު ބާއްވާ މަޖިލިސް އިންތިޚާބުގައި 93 ދާއިރާއަކަށް މެމްބަރުން އިންތިޚާބު ކުރާާނެއެވެ.