އޭޝިއަން ކަޕް ކުއާޓާ ފައިނަލުގައި އޭޝިއާގެ ފުޓުބޯޅައިގެ ވަރުގަދަ ދެ ބާރު ކަމުގައިވާ އޮސްޓްރޭލިއާ އާއި ސައުތު ކޮރެއާ ބައްދަލުކުރި މެޗުގައި، އޮސްޓްރޭލިއާއިން ގޯލެއް ކާމިޔާބުކޮށްފައި ވަނިކޮށް، ފަހަތުން އަރައި ކޮރެއާއިން މެޗު ކާމިޔަބުކޮށް، ސެމީ ފައިނަލުން ޖާގަ ހޯދައިފިއެވެ.

2015 ވަނަ އަހަރު އޮސްޓްރޭލިއާގައި ބޭއްވި މި މުބާރާތުގެ ފައިނަލުގައި ވެސް ބައްދަލުކޮށްފައިވަނީ މި ދެ ޓީމެވެ. ނަމަވެސް އެ މެޗުގައި، އޮސްޓްރޭލިއާއިން ވަނީ އެމީހުންގެ ސަޕޯޓަރުންގެ ކުރިމަތީގައި 2-1 އިން ކޮރެއާ ބަލިކޮށް، އޭޝިއާ ބައްރުގެ ފުޓުބޯޅައަށް 2006 ވަނަ އަހަރު އެ ޓީމު ބަދަލުކުރި ފަހުން ފުރަތަމަ ފަހަރަށް އޭޝިއަން ކަޕް ކާމިޔާބުކޮށްފައެވެ.

އަނެއް ކޮޅުން ކޮރެއާއަށް މި ތަށީގައި އަތް ނުލެވޭތާ 63 އަހަރު ވެއްޖެއެވެ. އެ ޓީމުން އެންމެ ފަހުން އޭޝިއަން ކަޕް ކާމިޔާބުކޮށްފައި ވަނީ، އެ ގައުމުގައި ބޭއްވި މުބާރާތުގައި، 1960 ވަނަ އަހަރުއެވެ.  

ރޭގެ މެޗުގައި އޮސްޓްރޭލިއާއިން ލީޑު ނަގާފައިވަނީ މެޗުގެ 42 ވަނަ މިނެޓުގައި އެ ޓީމުގެ ފޯވާޑް، ކްރެއިގް ގުޑްވިން ކާމިޔާބުކުރި ރީތި ގޯލަކުންނެވެ. އޮސްޓްރޭލިއާގެ ފަހަތުން ކަނާތް ފަރާތަށް ކުޅޭ އެޓްކިންސަން ގޯލު ކުރިމައްޗަށް މަތިން ހުރަސްކޮށްލި ބޯޅަ، ކޮރެއާ ޓީމުގެ ޑިފެންޑަރުންނާއި ކީޕަރުގެ ބޯމަތިން ވެއްޓުނީ ގޯލުގެ ފަހަތު ދަނޑިއާ ހިސާބުގައި ހުރި ގުޑްވިންގެ ފަޔަށެވެ. އޭނާ ބޯޅަ ގޯލަށް ފޮނުވާލީ އެއްބުރުންނެވެ.

ކޮރެއާއަށް މެޗުގެ ނަތީޖާ ހަމަހަމަ ކުރެވުނީ މެޗުގެ 90 މިނެޓު ހަމަވެ އިތުރު ވަގުތުގެ ކުޅުން ހިނގަމުން ދަނިކޮށް، އެ ޓީމުގެ ތަރި، ސޮން ހިއުން-މިންއަށް ކުރި ފައުލަކަށް ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބުކޮށްފައިވަނީ އިނގިރޭސި ޕްރިމިއަ ލީގުގެ ވުލްވަހެމްޓަން ވޯންޑާސް (ވޫލްވްސް) އަށް ކުޅެމުން އަންނަ ވަންގް ހީ-ޗާން އެވެ.

މި ގޯލާއެކީ އިތުރު ވަގުތުގެ ދެ ހާފު ކުޅެން ޖެހުނެވެ. ކޮރެއާއިން މެޗު ކާމިޔާބުކުރި ގޯލު ޖަހާފައިވަނީ މެޗުގެ 104 ވަނަ މިނެޓުގައި ސޮންއެވެ. ވާތް ފަރާތުން، ޕެނަލްޓީ އޭރިއާގެ ރޮނގު މަތިން ކޮރެއާއަށް ލިބުނު ހިލޭ ޖެހުން ސޮން ފޮނުވާލާފައިވަނީ ގޯލުގެ ވާތް ފަރާތުން މަތީ ކަނަށެވެ.

ސެމީ ފައިނަލްގައި ކޮރެއާ ނިކުންނާނި ޖޯޑަންއާ ދެކޮޅަށެވެ. މި ދެ ޓީމަކީ ވެސް ގްރޫޕް-އީ ގައި ހިމެނުނު ދެ ޓީމެވެ. ގްރޫޕް ސްޓޭޖުގައި މި ދެ ޓީމު ބައްދަލުކުރި މެޗު 2-2 އިން އެއްވަރުވެފައިވަނީ، ކޮރެއާއިން މެޗުގެ އިތުރު މިނެޓުގައި ކާމިޔާބުކުރި ގޯލަކުންނެވެ.

މުބާރާތުގެ ކުއާޓާ ފައިނަލް ދެ މެޗު މިއަދުވެސް ކުޅޭނެއެވެ. ފުރަތަމަ މެޗުގައި ރާއްޖެ ގަޑިން ހަވީރު 4:30 ގައި ބައްދަލުކުރާނީ ސަރަހައްދީ އެންމެ ވަރުގަދަ ދެ ޓީމުކަމުގައިވާ އިރާނާއި ޖަޕާނެވެ. ކުއާޓާގެ ފަހު މެޗުގައި މިރޭ 8:30 ގައި ބައްދަލުކުރާނީ މުބާރާތް ބާއްވާ ގައުމު، ގަތަރާއި އުޒްބެކިސްތާނެވެ.