ޑިމޮކްރެޓިކް ހަރަކާތް ސުލްހަވެރިކަމާ އަދި ފޯރީގައި ގެންދިއުމަށް އެމްޑީޕީ އޮތީ ތައްޔާރަށް ކަމުގައި އެމްޑީޕީގެ ޗެއާޕާރސަން ފައްޔާޒް އިސްމާއީލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ، މާދަމާ އޮންނަ އެމްޑީޕީގެ ޕްރައިމަރީގައި ވާދަކުރައްވާ ކެންޑިޑޭޓުންނަށް މަރުޙަބާ ވިދާޅުވެ ކުރެއްވި ޕޯސްޓްގައެވެ.

އެމްޑީޕީގެ ޕްރައިމަރީ އަބަދުވެސް ވެފައި އޮންނަނީ، ރާއްޖޭގައި ސިޔާސީ ޕާޓީއަކުން ބާއްވާ އެންމެ ބޮޑު އިންތިޚާބަށެވެ. މާދަމާ މުޅި ރާއްޖޭގައި އެމްޑީޕީގެ މަޖިލިސް ޕްރައިމަރީގެ ވޯޓުނެގުން ކުރިޔަށްދާނެއެވެ. މިޕްރައިމަރީގައި 149 ކެނޑިޑޭޓުން ވާދަކުރާނެއެވެ. އެއީ 40 އިންތިޚާބީ ދާއިރާއަކަށް ވާދަކުރައްވާ ކެނޑިޑޭޓުން ކަމުގައިވެސް އެމްޑީޕީން ވަނީ ހާމަކޮށްފައެވެ.

މި އިންތިޚާބުގެ ވޯޓުލުން ކުރިޔަށްދާނީ، މާދަމާ ހެނދުނު 09:00 ން ހަވީރު 04:00 އަށް ކަމުގައި އެމްޑީޕީން ވަނީ ބުނެފައެވެ.