އިންޑިއާ ސަރުކާރާއި ދިވެހި ސަރުކާރުން އުފައްދާފައިވާ، "ހައި ލެވެލް ކޯ ގްރޫޕް" ގެ ދެވަނަ ބައްދަލުވުމުގައި އިންޑިއާ އާއި ރާއްޖެއިން އެއްބަސްވީ، މެއި 10 ގެ ނިޔަލަށް ރާއްޖޭގައި ތިބި އިންޑިއާގެ ހުރިހާ ސިފައިން ބޭލުމަށް ކަމުގައި، ދިވެހި ޚާރިޖިއްޔާއިން ވިދާޅުވެއްޖެއެވެ.

"ހައި ލެވެލް ކޯ ގްރޫޕް" ގެ ދެވަނަ ބައްދަލުވުން ބާއްވާފައި ވަނީ، އިންޑިއާގެ ވެރިރަށް ނިއުދިއްލީގައި މިއަދުއެވެ.

ދިވެހި ޚާރިޖިއްޔާއިން ވިދާޅުވީ، "ހައި ލެވެލް ކޯ ގްރޫޕް" ގެ ދެވަނަ ބައްދަލުވުމުގައި،  ދިފާޢީ އަދި ސަލާމަތީ ދާއިރާއިން ގުޅުން ބަދަހިކުރުމާއި، އިޤްތިޞާދީ އަދި ތަރައްޤީގެ ދާއިރާއިން ދެޤައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމާ ބެހޭގޮތުން ވެސް މަޝްވަރާތައް ކުރެވުނު ކަމަށެވެ.

މިބައްދަލުވުންތަކުގެ މައިގަނޑު ބޭނުމަކަށް ވެފައި އޮތީ ރާއްޖޭގައި ތިބި އިންޑިއާ ސިފައިން ބޭލުން ކަމަށް ވާއިރު، ޚާރިޖިއްޔާއިން ނެރުނު ނޫސްބަޔާނުގައި ވިދާޅުވެފައި ވަނީ، ދެޤައުމުގެ މެދުގައި ކުރެވުނު މަޝްވަރާތަކުގައި އެއްބަސްވެވިފައި ވަނީ، ރާއްޖޭގައި އިންޑިއާ ސިފައިން ޤާއިމްވެފައި ތިބި ތިން އޭވިއޭޝަން ޕްލެޓް ފޯމުގެ ތެރެއިން އެއް ޕްލެޓްފޯމްގައި ތިބި ސިފައިން މާރިޗު 10 ގެ ކުރިން އިންޑިއާއަށް ގެންދިއުމަށާއި، އަދި މެއި 10ގެ ކުރިން އަނެއް ދެ ޕްލެޓްފޯމްގައި ތިބި އިންޑިއާގެ ސިފައިންވެސް އަނބުރާ ގެންދިޔުމަށެވެ. އެނގިފައިވާ ގޮތުގައި އިންޑިއާއިން ހުށައަޅާފައި ވަނީ، އިންޑިއާގެ ސިފައިންގެ ބަދަލުގައި، އިންޑިއާގެ މަދަނީން ބަދަލުގައި ބޭއްތިއްބުމަށެވެ.

އަދި ރާއްޖެއަށް އިންޑިއާއިން ހަދިޔާކޮށްފައިވާ، ދެ ހެލިކޮޕްޓަރާއި، ޑޯނިއާ ފްލައިޓް ދުއްވުމަށް އިންޑިއާގެ ސިފައިންކަމުގައި ނުހިމެނޭ އިންޑިއާ މީހުން ބޭތިއްބުމަށްވެސް އިންޑިއާއިން ވަނީ ހުށައަޅާފައި ކަމަށާއި އެގޮތަށް ދިވެހި ސަރުކާރުން އެއްބަސްވާކަމަށްވެސް އެނގިފައިވެއެވެ.

ޚާރިޖިއްޔާއިން ނެރުނު ބަޔާނުގައި ވިދާޅުވީ، "ހައި ލެވެލް ކޯ ގްރޫޕް" ގެ ތިންވަނަ ބައްދަލުވުން ބާއްވާނީ، މި ފެބުރުއަރީ މަހުގެ ފަހު ހަފްތާގައި މާލޭގައި ކަމަށެވެ.