މި ސަރުކާރު ހަވާލުވިއިރު މަސްވެރިންނަށް ދޭންޖެހޭ 250 މިލިއަނެއްހާ ރުފިޔާ ހުރި ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވުމަކީ ކަނޑައެޅިގެން ދޮގެއް ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އަމީރު ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަހު ދުވަސް ކަމަށްވާ ނޮވެމްބަރު 16ގެ ނިޔަލަށް މިފްކޯ އިން މަސްވެރިންނަށް ދައްކަން ޖެހޭ ފައިސާގެ އަދަދަކީ 185 މިލިއަން ރުފިޔާ ކަމަށެވެ.

ވަޒީރު ވަނީ ރައީސް އިބްރާހިމް މުހައްމަދު ސާލިހްގެ ސަރުކާރުން މަސްވެރިންނަށް ދޫކޮށްފައިވާ ފައިސާގެ ތަފްސީލްވެސް ހިއްސާކުރައްވާފައެވެ.

އަމީރު ވިދާޅުވީ ސަޕްލިމެންޓްރީ ބަޖެޓް ފާސްވުމާ އެކު ކުރީ ސަރުކާރުން ފައިސާ ދޫކުރުމުގެ އިންތިޒާމްތައް ހަމަޖެއްސި ކަމަށާއި މަސްވެރިންނަށް ފައިސާ ދޭން މިފްކޯ އަށް 100 މިލިއަން ރުފިޔާ އާ ސަރުކާރަށް ހަމަޖައްސައިދީފައިވާނެ ކަމަށެވެ.

އަމީރު ވިދާޅުވީ މަސްވެރިންނަށް ފައިސާދިނުމަށް ވުރެ، އެހެން އިސްރާފްތައް ކުރާ ނަމަ ފައިސާ ނުދެވޭނެ ކަމަށާއި މިއަށްވުރެ މާ ދަތި ދުވަސްތަކުގައި ވެސް ފައިސާ ދޫކޮށްފައިވާނެ ކަމަށެވެ.

މިހާރުގެ ފިޝަރީޒް މިނިސްޓަރު ޝިޔާމް ވިދާޅުވީ މިދިޔަ އަހަރުގެ ނޮވެމްބަރު 17 ގައި ރައީސް މުއިއްޒު މަގާމާ ހަވާލުވެވަޑައިގެންނެވި ފަހުން މިހާތަނަށް 276 މިލިއަން ރުފިޔާ އަށް ވުރެ ބޮޑު އަދަދެއް ސަރުކާރުން މަސްވެރިންނަށް ދޫކޮށްފައިވާ ކަމަށެވެ. އެ ފައިސާ ދޫކުރީ ރައީސްގެ ވަރަށް ބޮޑު އިސްނެންގެވުމާ އެކު އަދި ސަރުކާރުގެ އެހީތެރިކަން ދީގެން މިފްކޯ އިން ކަަމަށް މިނިސްޓަރު ވިދާޅުވި އެވެ.