މިދިޔަ ބުދަ ދުވަހު ރާއްޖޭގެ ކަނޑުގެ ސަރަހައްދަށް އިންޑިއާގެ ކަނޑުގެ ސިފައިން ވަދެ ރާއްޖޭގެ ތިން މަސްދޯންޏަކަށް އަރައި މަސްވެރިންނާއި ސުވާލުކޮށް، ބަލައި ފާސްކޮށްފައި ވަނިކޮށް، ރާއްޖޭގެ އަސްކަރިއްޔާއި އެސަރަހައްދު ޕެޓްރޯލް ކުރަންފަށައިފިއެވެ.

މޯލްޑިވްސް ނެޝަނަލް ޑިފެންސްފޯސް, އެމްއެންޑިއެފްއިން ވިދާޅުވީ، ކޯސްގާޑުގެ ޝިޕް ޝަހީދު އަލީ، ރާއްޖޭގެ އުތުރުން އިންޑިއާ އާއި ރާއްޖޭގެ އީއީޒެޑް ގުޅޭ ބޯޑަރު ސަރަހައްދުގައި މިހާރު ހަރަކާތްތެރި ވަމުންދާ ކަމަށެވެ. ބުދަ ދުވަހު އިންޑިއާ ސިފައިންގެ ކަނޑުގެ ދެ މަނަވަރަކުން ވަނީ، ތުރާކުނުގެ އިރުމަތިން ރާއްޖޭގެ ޚާއްޞަ އިޤުތިޞާދީ ސަރަހައްދުގައި، 72 މޭލު ބޭރުގައި މަސްވެރިކަން ކުރަމުން ދިޔަ 3 މަސްދޯންޏެއް ހުއްޓުވައި އެދޯނިތަކަށް އަރައި ބަލާފާސްކޮށްފައެވެ.

އިންޑިއާ ކަނޑުގެ ސިފައިން ރާއްޖޭގެ ސަރަހައްދަށް ވަދެ ހިންގި މިއަމަލަކީ ބައިނަލް އަޤުވާމީ ޤާނޫނުތަކާއި ޚިލާފު އަމަލެއް ކަމުގައި ޤާނޫނީ ދާއިރާގެ ބޭފުޅުން ވަނީ ވިދާޅުވެފައެވެ. ބުދަދުވަހު އިންޑިއާ ސިފައިންގެ ދެ މަނަވަރެއް ރާއްޖޭގެ ސަރަހަދަށް ވަދެ މަސްދޯނިތަކަށް އެރުމުން އެކަން ސަރުކާރާއި ކަމާއި ބެހޭ ފަރާތްފަރަތްތަކުގެ ސަމާލުކަމަށް ގެނެސްފައި ވަނީ ބޮޑުކަންނެލި މަސްވެރިންގެ ޔޫނިއަންގެ ފަރާތުންނެވެ.

އިންޑިއާ ސިފައިން ހަތިޔާރާއިއެކު ދޯނި ފަހަރަށް އަރައި، ބަލައި ފާސްކުރަމުން ދިޔަ ވަގުތު ނަގާފައިވާ ވީޑިއޯތައް ބޮޑުކަންނެލި މަސްވެރިންގެ ޔޫނިއަންއިން ވަނީ އެޔޫނިއަންގެ ސޯޝަލް މީޑިއާ އެކައުންޓްތަކުގައި މިއަދު ޕޯސްޓްކޮށްފައެވެ.

ބުދަދުވަހު އިންޑިއާ ކަނޑުގެ ސިފައިން ރާއްޖޭގެ ސަރަހައްދަށް ވަދެ އަރާފައި ވަނީ، އަސުރުމާ-3 އަދި ނިރު-7 ދޯނީގެ އިތުރުން، މާހޯރަ-3 ނަމަކަށް ކިޔާ ދޯންޏަކަށެވެ. އެތިން ދޯންޏަށް ހަތިޔާރާއިއެކު އިންޑިއާގެ ކަނޑުގެ ސިިފައިން އަރައި ސުވާލުކޮށްފައި ވަނީ އެދޯނި ފަހަރުގައި ބޭނުންކުރާ މުވާޞަލާތީ ވަސީލަތްތަކާއި ބެހޭ ގޮތުން ކަމަށް މަސްވެރިން ވަނީ ބުނެފައެވެ. އިންޑިއާގެ ކަނޑުގެ ސިފައިން ރާއްޖޭގެ ސަރަހައްދަށް ޤަވާއިދާއި ޚިލާފަށް ވަދެ މިޢަމަލުތައް ހިންގި އިރު، ރާއްޖެއާ އިންޑިއާގެ ގުޅުން މިވަގުތު އޮތީ ވަރަށް ބޮޑަށް ގޯސްވެފައެވެ.