ގަތަރުގައި މިހާރު ކުރިޔަށްދާ އޭޝިއަން ކަޕްގެ ކުއާޓާ ފައިނަލްގައި މިރޭ ރާއްޖެ ގަޑިން 8:30 ގައި އޮސްޓްރޭލިއާ އަދި ސައުތު ކޮރެއާ ބައްދަލުކުރާއިރު، މި މެޗު ކާމިޔާބު ކުރުމުގެ ފުރުސަތު ބޮޑީ އޮސްޓްރޭލިއާއަށެވެ.

އޮސްޓްރޭލިއާއިން ވަރަށް ފަސޭހަކަމާއެކު ރައުންޑް-އޮފް-ސިކްސްޓީންގައި 4-0 އިން އިންޑޮނޭޝިއާ ބަލިކޮށް ކުއާޓާ ފައިނަލުގެ ޖާގަ ކަށަވަރު ކުރިނަމަވެސް، ކޮރެއާއަށް ކުއާޓާ ފައިނަލު ކަށަވަރު ކުރެވުނީ އޭގެ ދެ ދުވަސް ފަހުން، 120 މިނެޓު ކުޅެ ޕެނަލްޓީ ޖަހައިގެން ސައުދީ އަރަބިއްޔާ ބަލިކުރުމަށްފަހުއެވެ. އެހެންކަމުން، މި މެޗުގައި އޮސްޓްރޭލިއާއަށް އޮތް އެންމެ ބޮޑު ފައިދާއަކީ އަރާމު ކުރާނެ ގިނަ ދުވަސްތަކެއް ލިބިފައިވުމެވެ.

ކުއާޓާ ފައިނަލާ ގުޅޭ ގޮތުން ކޮރެއާގެ ކޯޗު ކްލިންސްމަން ފާހަގަ ކުރި ގޮތުގައި، ކޮރެއާއަށް އޮސްޓްރޭލިއާގެ މައްޗަށް ކުރި ހޯދޭނީ ވޭނާއި ރިހުންތަކަށް ކެތްތެރިވެގެން ކަމަށެވެ. އަދި އޭނާ ބުނިގޮތުގައި، މިކަހަލަ މުބާރާތެއްގައި ކުރި ހޯދޭނީ ވެސް އެފަދަ ހިތްވަރެއް ހުރި ޓީމަކަށް ކަމަށެވެ.

ކަން މިހެން އޮތް ނަމަވެސް، ކްލިންސްމަން ބުނީ ޔޫރަޕްގައި ކުޅޭ ކުޅުންތެރިންތަކެއް އެ ޓީމުގައި ތިބުމަކީ ފައިދާއެއް ކަމަށާއި، ނަފްސާނީ ގޮތުން ކުޅުންތެރިން ފިޓްކޮށް ތިބެއްޖެނަމަ، އެމީހުންގެ އުއްމީދު ހާސިލްވުމަކީ ކައިރީގައި އޮތް ކަމެކެވެ.

ކޮރެއާ ޓީމުގައި އެންމެ މޮޅަށް ކުޅެމުން އަންނަ އިނގިރޭސި ޕްރިމިއަ ލީގުގެ ޓޮޓެންހަމްގެ ސޮން ހިއުން-މިން އާއި ފްރާންސް ލީގުގެ ޕީއެސްޖީއަށް ކުޅެމުން އަންނަ ލީ ކަންގް-އިން އާއެކު ޖުމްލަ 6 ކުޅުންތެރިއެއް ވަނީ މުބާރާތުގެ ހުރިހާ މެޗެއްގައި ފުލްކޮށް ކުޅެފައެވެ. ނަމަވެސް އޮސްޓްރޭލިއާ ޓީމްގައި ހުރިހާ މެޗެއްގައި ފުލްކޮށް ކުޅެފައިވަނީ 4 ކުޅުންތެރިންނެވެ. މީގެ އިތުރުން އޮސްޓްރޭލިއާއަށް ރެސްޓުކުރަން ލިބުނު ދުވަސްތައް ގިނަ ވުމަކީ، އެ ޓީމުގެ ކޮޅަށް މެޗު ބުރަވާ އަނެއް ސަބަބެވެ.

އެހެންކަމުން، މިހާރު ފީފާ ރޭންކިންގައި ކޮރެއާ (23) އިން އޮސްޓްރޭލިއާއަށް (25) ވުރެން ދެ ރޭންކު މަތީގައި އޮތް އޮތުން މި މެޗަށް ފަހު ބަދަލުވެގެން ދިއުމަކީ އެކަށީގެންވާ ކަމެކެވެ.

މުބާރާތުގެ ކުއާޓާ ފައިނަލްގެ މެޗެއް މިއަދު ހަވީރު ވެސް ކުޅުމަށް ހަމަޖެހިފައިވެއެވެ. ރާއްޖެ ގަޑިން 4:30 ގައި ފެށުމަށް ހަމަޖެހިފައިވާ އެ މެޗުގައި ބައްދަލު ކުރާނީ، ޕެނަލްޓީ ޖަހައިގެން ޔޫއޭއީ ބަލިކުރުމަށްފަހު ކުއާޓާއިން ޖާގަ ހޯދި ތަޖިކިސްތާނާއި، 3-2 އިން އިރާގު ބަލިކުރި ޖޯޑަންއެވެ.

މި މުބާރާތުގައި މާދަމާ ވެސް ވަރަށް ފޯރި ގަދަ މެޗެއް ކުޅޭނެއެވެ. އެއީ އޭޝިއާ ރޭންކިންގެ އެންމެ މަތީގައި އޮތް ޖަޕާނާއި، ދެވަނައަށް އޮތް އިރާން ބައްދަލުކުރާ މެޗެވެ. އެ މެޗު ފެށުމަށް ހަމަޖެހިފައިވަނީ ރާއްޖެ ގަޑިން ހަވީރު 4:30 ގައެވެ. ކުއާޓާގެ ފަހު މެޗުގައި މާދަމާ ރޭ 8:30 ގައި ކުޅޭނީ މުބާރާތް ބާއްވާ ގަތަރާއި އުޒްބެކިސްތާނެވެ.