ދިވެހިރާއްޖެއާ އިންޑިއާއިން މަޝްވަރާކުރަން ޖެހޭ ކަންކަމާއި ގުޅިގެން ދެ ޤައުމުގެ އިސް އޮފިޝަލުން ބައިވެރިވެވަޑައިގަންނަވާ ހައި ލެވެލް ކޯ ގްރޫޕުގެ ދެ ވަނަ ބައްދަލުވުުން މިއަދު ނިއުދިއްލީގައި ކުރިޔަށް ދާނެ ކަމުގައި ޚާރިޖިއްޔާއިން ވިދާޅުވެއްޖެއެވެ.

ޚާރިޖިއްޔާއިން ނެރުނު ދެފޮޅުވަތުގެ ނޫސްބަޔާނުގައި، ވިދާޅުވީ، މިބައްދަލުވުމަކީ، ރައީސް ޑރ. މުޙައްމަދު މުޢިއްޒު އިންޑިއާގެ ބޮޑުވަޒީރާ އެކު މިދިޔަ އަހަރު ޑިސެމްބަރު މަހު ދުބާއީގައި ބޭއްވެވި ބައްދަލުކުރެއްވުމުގައި، ދެ ލީޑަރުން އެއްބަސްވެވަޑައިގަތް ގޮތަށް އެކުލަވައި ލާފައިވާ ހައި ލެވެލް ކޯ ގްރޫޕުގެ ދެވަނަ ބައްދަލުވުން ކަމަށެވެ.

މިބައްދަލުވުމުގައި ބައިވެރިވާ ރާއްޖޭގެ ވަފުދު މިހާރު ވަނީ ދިއްލީއަށް ގޮސްފައެވެ.

ދެ ޤައުމުގައި ކުރިޔަށްދާ މަޝްވަރާތަކުގެ އެންމެ މުހިއްމު ކަމަކަށް އޮތީ، އިންޑިއާ ސިފައިން ރާއްޖެއިން ބޭލުމެވެ. ރާއްޖޭގައި ތިބި އިންޑިއާ ސިފައިން މާރިޗު 15 ގެކުރިން ރާއްޖެއިން ފޭބުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އިންޑިއާއަށް އަންގަވާފައެވެ.

އިންޑިއާ ދިވެހި ރާއްޖޭގެ ގުޅުން އިންތިހާއަށް ގޯސްވެފައި ވާއިރު ބުދަ ދުވަހު އިންޑިއާ ސިފައިން ވަނީ ޤާނޫނާއި ޚިލާފަށް ރާއްޖޭގެ ސަރަހަށްދަށް ވަދެ ދިވެހި 3 މަސްދޯންޏަކަށްވެސް އަރާފައެވެ.