ޕްރޮސެކިއުޓަރ ޖެނެރަލް ޙުސައިން ޝަމީމަށް ޙަމަލާދިނުމުގެ ތުހުމަތުގައި ހައްޔަރުކުރި ދެމީހުން ޝަރީއަތް ނިމެންދެން ބަންދުކޮށްފިއެވެ.

ފުލުހުންގެ އިދާރާއިން ވިދާޅުވީ، ޕީޖީ ޝަމީމަށް ހަމަލާދިނުމުގެ ތުހުމަތުގައި މިއަދު ހައްޔަރު ކުރި ދެމީހުންގެ ބަންދާއި މެދު ގޮތެއް ނިންމުަމަށް މިއަދު ކްރިމިނަލްކޯޓަށް ޙާޟިރުކުރުމުން ޝަރީއަތް ނިމެންދެން އެދެމީހުން ބަންދުގައި ބޭއްތިބުމަށް ކޯޓުން އަމުރުދީފައިވާ ކަމަށެވެ.

ޕީޖީ ޝަމީމަށް ހަމަލާދިން މައްސަލައިގެ ތަޙްޤީޤާއި ގުޅޭ މައުލޫމާތު ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި، ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ، ޕީޖީ ޝަމީމަށް ހަމަލާދިނުމުގެ ކުށުގެ ތުހުމަތުގައި ހައްޔަރުކުރި ދެމީހުން، ހައްޔަރުކޮށްފައި ވަނީ ގްރޭޓަރ މާލެ ސަރަހައްދުން ކަމަށެވެ. އަދި އެމީހުން ޕީޖީ ޝަމީމަށް ހަމަލާދީފައިވަނީ ދުރާލައި ރާާވައިގެން ކަމުގައި ބެލެވޭ ކަމުގައިވެސް ސީޕީ ވަނީ ވިދާޅުވެފައެވެ.

ޕީޖީ ޝަމީމަށް ހަމަލާދިން މައްސަލައިގެ ތަހްޤީޤުގެ ވަރަށް ކުރީކޮޅު ކަމުގައި ވާތީ، އެމައްސަލައިގެ ތަޙްޤީޤަށް ހުރަސް އެޅިދާނެކަމަށްޓަކައި ބައެއް މައުލޫމާތު މިވަގުތު އަދި ހާމަކުރެވެން ނެތްކަމުގައިވެސް ސީޕީ ވަނީ ވިދާޅުވެފައެވެ. އެހެން ނަަމަވެސް ހައްޔަރުކުރި މީހުންގެ ވަނަވަރު ހާމަކުރައްވާނެ ކަމުަގައި ސީޕީ ވަނީ ވިދާޅުވެފައެވެ.

ޕްރޮސެކިއުޓަރ ޖެނެރަލް ޙުސައިން ޝަމީމަށް ހަމަލާދީފައި ވަނީ، އިއްޔެ ހެނދުނު މާލޭ ނޫރު މިސްކިތް ކައިރިންނެވެ. ހަމަލާދިން މީހުން ތިބީ ހެލްމެޓް އަޅައި މޫނު ނިވާކޮށްގެންނެވެ. އެމީހުން ދިން ހަމަލާގެ ސަބަބުން ޕީޖީ ޝަމީމްގެ ވާތުގެ ކަށިގަނޑެއްގައި ރެނދުލާފައިވާކަމަށް ޝަމީމް ވަނީ ވިދާޅުވެފައެވެ.