މަސްކިރުވާފައި މަސްވެރިންނަށް ނުދެވި ހުރި ފައިސާ، މިފްކޯއިން ލޯނެއް ނަގައިގެން ވިޔަސް އަވަރަށް އަވަހަށް މަސްވެރިންނަށް ދެއްވާނެ ކަމުގައި ރައީސުލްޖުމްހޫރިއްޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު  ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސަރުކާރުގެ ފަރާތުން ސޯޝަލް މީޑިއާގައި މިއަދު ފެށި ރައީސްގެ ޖަވާބު ސިލްސިލާގައި، ހިމަނާފައިވާ މަސްވެރިއެއްގެ ސުވާލަށް ދެއްވި ޖަވާބުގައެވެ.

މަސްވެރިޔާ ސުވާލުކޮށްފައިވަނީ މަސްވެރިން ކިރުވާ މަހަށް 48 ގަޑިއރުގެ ތެރޭގައި ފައިސާ ދޫކުރުމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އެމަނިކުފާނުގެ ރިޔާސީ އިންތިޚާބުގެ ކެމްޕޭނުގެ ތެރޭގައި ވެވަޑައިގެންފައިވާ ވަޢުދާއި ގުޅޭ ގޮތުންނެވެ.

ރައީސުލްޖުމްހޫރިއްޔާ ދެއްވި ޖަވާބުގައި ވިދާޅުވީ، އެމަނިކުފާނު ސަރުކާރާއި ހަވާލުވި އިރު މަސްވެރިންނަށް ވަރަށް 250 މިލިޔަނަށްވުރެ ގިނަ ރުފިޔާ ނުދެވި ހުރިކަމަށެވެ. އަދި ސަރުކާރުން ވަނީ ދެފަހަރެއްގެ މަތިން ދުއިސައްތަ މިލިޔަން ރުފިޔާ މަސްވެރިންނަށް ދޫކޮށްފައި ވާކަމަށާއި، މިހާރުވެސް 270 މިލިޔަން ރުފިޔާ މަސްވެރިންނަށް ނުދެވި އޮތް ކަމުގައި އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މަސްވެރިންނަށް ދޭންޖެހޭ ފައިސާ ވަރަށް އަވަހަށް ދެވޭނެ ކަމުގެ ޔަޤީންކަން އެބައޮތް ކަމަށެވެ. މިގޮތުން ހުރިހާ މަސްވެރިންނަށް ދޭން ހުރި ހުރިހާ ފައިސާއެއް ހަމަ ވަރަށް އަވަހަށް ހަވާލުކުރުމުގެ މަސައްކަތް ކުރާ ކަމަށާއި، އަދި ކުރިޔަށް އޮތް ތަނުގައި ބޮޑު އަދަދަކުން ފައިސާ ނުދެއްކި އޮންނަ އޮތުމަށްވެސް ހައްލު ހޯއްދަވާނެ ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.

މަސްވެރިން ކިރުވާ މަހަށް ފައިސާ ނުލިބޭތީ، ދޯނި ފަހަރަށް ތެެޔޮ އަޅައިގެން ނުދުއްވޭ ހާލަތަށް ގޮސްފައިވާ ކަމުގައި މަސްވެރިން ވަނީ ބުނެފައެވެ.