އޮންލައިންކޮށް ހިންގާފައިވާ ސްކޭމްތަކުގައި މީހުންގެ އަތުން ގެއްލުނު ފައިސާގެ އަދަދު 150 މިލިއަނަށް އަރާކަމުގައި ފުލުހުންގެ އިދާރާއިން ވިދާޅުވެއްޖެެއެވެ.

ނޫސްވެރިންނަށް މައުލޫމާތު ދިނުމަށް އިއްޔެ ހަވީރު އިސްކަންދަރުކޮށީގައި ފުލުހުން ބޭއްވި ނޫސްވެރިންގެ ބައްދަލުވުމުގައި، ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ހެޑް ސްޕްރިންޓެންޑެންޓް އޮފް ޕޮލިސް ޢަބުދުﷲ ރަޝީދު ވިދާޅުވީ، ސްކޭމްތަކާއި ގުޅޭ ގިނަ މައްސަލަތަކެއް ފުލުހުންނަށް ހުށައެޅޭ އިރު، އެކި އެކި ގޮތްގޮތުން ސްކޭމްތަކުން މީހުންގެ އަތުން ގެއްލުނު ފައިސާގެ ޖުމުލަ އަދަދު 150 މިލިޔަނަށް އަރާކަމަށެވެ. އަދި 2021 ވަނަ އަހަރުން ފެށިގެން މިހާތަނަށް 57 މިލިއަނަށް ވުރެ ގިނަ ރުފިޔާ ސްކޭމްތަކުގެ ތެރެއިން ރައްޔިތުންގެ އަތުން ގެއްލިފައި ވާއިރު އޭގެ ތެރެއިން އަނބުރާ ހޯދުނީ މިލިޔަނެއްހައި ރުފިޔާކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ޢަބުދުﷲ ރަޝީދު ވިދާޅުވީ، ފުލުހުންނަށް އެކިއެކި ސްކޭމްތަކުގެ ތެރެއިން މީހުންގެ އަތުން ފައިސާ އަތުލުމުގެ 28 ހާހަށްވުރެ ގިނަ މައްސަލަ ފާއިތުވި 4 އަހަރެއްހާ ދުވަހުގެ ތެރޭގައި ހުށައެޅިފައިވާ ކަމަށެވެ. ޢަބުދުﷲ ރަޝީދު ވިދާޅުވީ، ސްކޭމްތަކަށް މީހުން ހޭލުންތެރި ކުރުމުގެ މަސައްކަތްތައް ކުރަމުން އަންނައިރު، ސްކޭމްތައް ހިންގާ މީހުންވެސް އެމީހުން ބޭނުން ކުރާ އުކުޅުތައްވެސް ބަދަލު ކުރަމުން އަންނަ ކަމަށެވެ. އަދި ސްކޭމްތައް ހިންގާފައިވާގޮތަށް ބަލާއިރު، މީހުންގެ ބޭންކް އެކައުންޓްތަކުގެ ކޮންޓްރޯލް ހޯދައިގެން އެ އެކައުންޓުތަކުގައި ހުންނަ ފައިސާ ނަގާފައިވާ މައްސަލަތައްވެސް ހުށައެޅިފައިވާ ކަމުގައި އޭނާ ވިދާޅުވިއެވެ. މިގޮތުން އެފަދަ މައްސަލަތައް އެންމެ ގިނައިން ރިޕޯޓްކޮށްފައި ވަނީ މި ނިމުނު 2023 ވަނަ އަހަރުގައި ކަމަށްވެސް އޭނާ ވިދާޅުވިއެވެ.

ފުލުހުންގެ އިދާރާއިން ވަނީ ސްކޭމްތަކުގެ ސަބަބުން އާއްމު ރައްޔިތުންގެ އަތުން ގެއްލޭ ފައިސާ އަނބުރާ ހޯދުމަކީ އެކަމުގައި ގިނަ ގޮންޖެހުންތަކެއް އޮތް ކަމެއް ކަމުގައިވެސް ވިދާޅުވެފައެވެ.