ބާ ކައުންސިލްގެ ރައީސް އަދި ކުޅަދާނަ ޤާނޫނީ ވަކީލް އިސްމާޢީލް ވިޝާމް ކުއްލި ގޮތަކަށް އަވަހާރަވުމުން ރާއްޖޭގެ ޤާނޫނީ ދާއިރާއަށް ލިބިގެން އެދިޔައީ ނުހަނު ބޮޑު ހުސްކަމެއް ކަމުގައި ކުރީގެ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ބާ ކައުންސިލްގެ ރައީސް އިސްމާޢީޅް ވިޝާމް އަވަހާރަވުމާއި ގުޅިގެން އެ އާއިލާއަށް ތަޢުޒިޔާ ފޮނުއްވައި ކުރެއްވި ޕޯސްޓްގައެވެ.

ރައީސް ޞާލިޙް ވިދާޅުވީ، އެހާ ޒުވާން އުމުރުގައި ރާއްޖޭގެ ލީގަލް ޕްރޮފެޝަން ކުރިއެރުވުމަށް ވިޝާމް ކޮށްދެއްވި މަސައްކަތް އަބަދުވެސް ފާހަގަކޮށްލެވޭނެކަމަށެވެ.

ބާކައުންސިލްގެ ރައީސް ކަމުގެ މަޤާމަށް 11 ޖޫން 2022 ގައި އިންތިޚާބުވެ ވަޑައިގެންނެވި، ޤާނޫނީ ވަކީލް ވިޝާމް އަވަހާރަވީ ރޭގެ ވަގުތެއްގައި އޭނާ ދިރިއުޅުއްވާ ގެކޮޅުގައެވެ.

ވިޝާމްއަކީ، ރާއްޖޭގެ ޤާނޫނީ ދާއިރާގައި ފާހަގަކޮށްލެވޭ ވަކީލެކެވެ. ބޮޑެތި މައްސަލަތަކުގައި އޭނާ ކޯޓުތަކުގައި ވަކާލާތު ކުރައްވާފައި ވާއިރު، އޭނާއަކީ، އެސިސްޓެންޓް އެޓަރނީ ޖެނެރަލްގެ މަޤާމުވެސް ފުރުއްވާފައިވާ ބޭފުޅެކެވެ.