ހުޅުމޭލެ ފޭސް 1ގައި ސޯޝަލް ހައުސިންގ ސްކީމްތަކުގެ ދަށުން ދޫކޮށްފައިވާ ފްލެޓްތަކުގެ ކުލި ކުޑަކުރެއްވިކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރައްވާފައި ވީނަމަވެސް، ބައެއް ފްލެޓްތަކުގެ ކުލި ކުޑަ ނުވާކަމާއި، ކުލި ކުޑަކޮށްފައި ވަނީ ހަމައެކަނި އެޗްޑީސީއަށް ފައިސާ ދައްކަންޖެހޭ ފްލެޓްތަކުން އެކަނިކަން ހާމަވެއްޖެއެވެ.

އެޗްޑީސީން އިއްޔެ އާއްމު ކުރި ބަޔާނެއްގައި ބުނެފައި ވަނީ، އެޗްޑީސީއަށް ފައިސާ ދައްކަންޖެހޭ ފޭސް 1 ގެ ފްލެޓްތަކަށް، މި ފެށުނު ފެބުރުއަރީ މަހުގެ 1 ވަނަ ދުވަހުންފެށިގެން، މެއިންޓަނަންސްފީ ނުހިމަނައި، ކުލީގެ %20 އިންސައްތަ ކުޑަކޮށްދިނުމަށް ނިންމާފައިވާ ކަމަށެވެ. އަދި އެކަމާއި ގުޅޭ ގޮތުން އިތުރު މައުލޫމާތު ބޭނުންވާ ފަރާތްތަކުން އެކުންފުނީގެ ހޮޓްލައިން 1516އަށް ގުޅުއްވައިގެން މައުލޫމާތު ސާފު ކުރެއްވުމަށްވެސް އެޗްޑީސީން ވަނީ އެދިފައެވެ.

އެޗްޑީސީއަށް ފައިސާ ދައްކަން ޖެހޭ، ފްލެޓްތަކުގެ ކުލިން %20  ކުޑަކުރި ނަމަވެސް، ހުޅުމާލެ ފޭސް 1ގައި ހުރި، ހައުސިންގ ފައިނޭންސް ޑިވެލޮޕްމެންޓް ކޯޕަރޭޝަން (އެޗް.ޑީ.އެފް.ސީ)އަށް ކުލި ދައްކަންޖެހޭ، ހުޅުމާލެ ފޭސް 1 އިން އެންމެ ފަހުން ދޫކޮށްފައިވާ 704 ފްލެޓްގެ ކުލި މިހާތަނަށް އަދި ކުޑަނުކުރާކަމުގައި އެކުންފުނީގެ ފަރާތުން އެކުންފުންޏަށް ފްލެޓް ކުލި ދައްކާ ފަރާތްތަކަށް ވަނީ މައުލޫމާތު ދީފައެވެ. އެނގިފައިވާ ގޮތުގައި ހުޅުމާލެ ފޭސް 1 އިން އެންމެ ފަހުން ސޯޝަލް ހައުސިންގ ސްކީމްގެ ދަށުން ދޫކުރި، 704 ފްލެޓްގެ ކުއްޔަށް ބަދަލެއް ގެނައުމާއި ގުޅޭ ގޮތުން، ސަރުކާރުން އެޗްޑީއެފްސީއާ މުޢާމަލާތެއް ކޮށްފައެއް ނުވެއެވެ.
ސޯޝަލް ހައުސިން ސްކީމްތަކުގެ ދަށުން ދޫކޮށްފައިވާ ފްލެޓްތަކުގެ ކުލި ދެއްކުން ލުއިކޮށްދެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. އަދި އެމަނިކުފާނުގެ ސަރުކާރުގެ ހަފްތާ 14ގައި ޙާސިލްކުރުމަށް ކަނޑައަޅާފައިވާ ލަނޑުދަނޑިތަކުގެ ތެރޭގައިވެސް އެކަން ވަނީ ހިމަނާފައެވެ.