ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ރަށްވެހިވެފައިވާ ރަށްނޫން އެހެންތަނެއްގައި ވޯޓުލާން ބޭނުންވާ ފަރާތްތަކުން، ރީރެޖިސްޓްރީ ކުރުމުގެ ފުރުޞަތު އިލެކްޝަންސް ކޮމިޝަނުން ހުޅުވާލައިފިއެވެ.

އެކޮމިޝަނުން ވިދާޅުވީ، ރީރެޖިސްޓްރީކުރުމަށް ހުށައަޅަން ޖެހޭނީ އޮންލައިންކޮށް ކަމަށާއި، މިއަދުން ފެށިގެން މިފެބުރިއަރީ މަހުގެ 7 ވަނަ ދުވަހުގެ ހަވީރު 4:00 އާއި ހަމައަށް ރީރެޖިސްޓްރީވާން ހުށައެޅުމުގެ ފުރުޞަތު އޮންނާނެކަމަށެވެ.

މިގޮތުން މަޖިލިސް އިންތިޚާބަށް ރީރެޖިސްޓްރީ ކުރުމަށް ހުށައަޅަން ޖެހޭނީ، ނިމިދިޔަ ރިޔާސީ އިންތިޚާބުގެ ދެވަނަ ބުރުގައި ވޯޓުލީ އިރު ހުރިތަން ފިޔަވައި އެހްންތަނެއްގައި ވޯޓުލާން ބޭނުންވާނަމަ ކަމަށްވެސް އިލެކްޝަންސް ކޮމިޝަނުން ވަނީ ވިދާޅުވެފައެވެ.

ވޯޓާސް ރެޖިސްޓްރީގައި އެމީހަކު މިހާރު ވޯޓުލާންޖެހޭތަނާއި ގުޅޭ މައުލޫމާތު އިލެކްޝަންސް ކޮމިޝަނުގެ ވެބްސައިޓުންނާއި، 14141އަށް މެސެޖްކޮށްގެންވެސް ޗެކް ކުރެވޭނެ ކަމުގައި އިލެކްޝަންސް ކޮމިޝަނުން ވިދާޅުވެއެވެ.

މިހާރު އޮތް ގޮތުން ރައްޔިތުންގެ މަޖިލީހުގެ އިންތިޚާބުގެ ވޯޓުލުން އޮންނާނީ ކުރިޔަށް އޮތް މާރިޗު މަހުގެ 17 ވަނަ ދުވަހުގައެވެ.