އިންޑިއާ ނޭވީގެ ދެ މަނަވަރެއް ރާއްޖޭގެ ކަނޑުގެ ސަރަހައްދަށް ވަދެ ރާއްޖޭގެ އިތުރު ދެމަސްދޯންޏަކަށްވެސް އިންޑިއާ ނޭވީގެ ސިފައިން އަރާފައިވާ ކަމުގައި ބޮޑު ކަންނެލި މަސްވެރިންގެ ޔޫނިއަންއިން ބުނެފިއެވެ.

އެޔޫނިއަންއިން ބުނީ، އެ ސަރަހައްދުގައި މަސްވެރިކަން ކުރަމުންދިޔަ އަސުރުމާ3، ދޯނީގެ އިތުރުން،  ނިރު7 އަދި މާހޯރަ3 މި ދެ ދޯންޏަށްވެސް އިންޑއާގެ ދެ ކޯސްޓްގާޑް ކައިރިކޮށް ސިފައިން އެރިކަމަށް މަޢުލޫމާތުލިބިފައިވާ ކަމަށެވެ. އަދި ދޯނި ފަހަރަށް ސިފައިން އެރިއިރު އެމީހުން އަތުގައި ހަތިޔާރުހުރި ކަަމަށްވެސް މައުލޫމާތު ލިބިފައިވާ ކަމުގައި އެޔޫނިއަންއިން ވަނީ ބުނެފައެވެ.

އެންމެ ފުރަތަަމަ މައުލޫމާތު ލިބުނީ، އަސުރުމާ -3 ދޯންޏާއި އިންޑިއާ ނޭވީގެ ދެ މަނަވަރެއް ކައިރިކޮށް އެދޯންޏަށް އިންޑިއާ ސިފައިން އެރި ކަމަށެވެ.

ފިޝަރީޒް މިނިސްޓަރ އަޙްމަދު ޝިޔާމް ވިދާޅުވީ، ބޭރުގެ ސިފައިން އަސުރުމާ -3 އަށް އަރާފައިވަނީ އެދޯނި ރާއްޖޭގެ ސަރަހައްދުގައި އޮއްވައި ކަމަށެވެ.