އާދީއްތަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގެ ތެރޭގައި ހިނގައި ދިޔަ ހަމަނުޖެހުންތަކުގެ މައްސަލަތައް ބަލަމުންދާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި، އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ، މަޖިލީހުގެ އިދާރާގައި ހިނގައި ދިޔަ ހަމަނުޖެހުންތައް ފުުލުހުންގެ ޚިދުމަތުން ބަލަން ފަށާފައި ވަނީ، މަޖިލީހުގެ އިދާރާއިން އެކަން ފުލުހުންނަށް ހުށައެޅުމުން ކަމަށެވެ. އަދި އެދުވަހުގެ ހަމަނުޖެހުންތަކުގައި އަނިޔާ ލިބުނު ބޭފުޅުންގެ ފަރާތްޕުޅުންވެސް މައްސަލަތައް ހުށައަޅުއްވާފައިވާކަން އޭނާ ފާހަގަކުރައްވާފައިވެއެވެ.

ނާފިޒް ވިދާޅުވީ، ހުށައެޅިފައިވާ މައްސަަލަތަކުގެ ތެރޭގައި، މެމްބަރުންނަށް އިންޒާރުދީ ބިރުދެއްކުމުގެ މައްސަލަތައްވެސް ހިމެނޭ ކަމަށާއި، ފުލުހުންގެ ފަރާތުން ރައްކާތެރިކަން ފޯރުކޮށް ދިނުމަށްވެސް މެމްބަރުން ހުށައަޅުއްވާފައިވާކަމަށެވެ. އެހެންވެ މެމްބަރުންގެ ރައްކާތެރިކަމަށްޓަކައި އަޅަންޖެހޭ ފިޔަވަޅުތައްވެސް އަޅާފައިވާ ކަމުގައި ނާފިޒް ވިދާޅުވިއެވެ.

އާދިއްތަ ދުވަހުގެ ޖަލްސާގައި ހަމަނުޖެހުންތައް ހިންގާފައި ވަނީ، ސަރުކާރަށް ތާއީދުކުރާ މަޖިލީހުގެ މެމްބަރުން ޖަލްސާއަށް ހުރަސް އެޅުމުންނެވެ. މި ހަމަނުޖެހުމުގެ ތެރޭގައި، މެމްބަރުންގެ މެދުގައި މާރާމާރީވެސް ވަނީ ހިނގާފައެވެ.