ޕްރޮސެކިއުޓަރ ޖެނެރަލް ޙުސައިން ޝަމީމަށް ޙަމަލާދިން މީހުން ހޯދުމުގެ މަސައްކަތް ކުރަމުންދާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

މިއަދު ހަވީރު ފުލުހުންގެ އިދާރާއިން ބޭއްވި ނޫސްވެރިންގެ ބައްދަލުވުމުގައި، އެކްޓިންގ ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސްޕްރިންޓެންޑެންޓް އަޙްމަދު ނާފިޒް ވިދާޅުވީ، ޕްރޮސެކިއުޓަރ ޖެނެރަލް ޙުސައިން ޝަމީމަށް މިއަދު ހެނދުނުދިން ހަމަލާއަކީ ފުލުހުން ވަރަށް ބޮޑަށް ކަންބޮޑުވާ ކަމެއް ކަމަށެވެ. އަދި އެއީ ދިވެހި ފުލުހުންގެ ޚިދުމަތުން ވަރަށް ސީރިއަސް ކަމާއިއެކު ބަލާނެ މައްސަލައެއްކަމަށާއި އެމައްސަލައިގެ އެންމެ ފުނަށް ވާޞިލްވުމަށް ފުލުހުންނަށް ލިބިހުރި ހުރިހާ ވަސީލަތްތަކެއްގެ ބޭނުން ހިފާނެކަމުގައިވެސް އޭނާ ވިދާޅުވިއެވެ. 

ނާފިޒް ވިދާޅުވީ، އެހަމަލާ އާއި ގުޅިގެން، އެހަމަލާދިން މީހުން އައިޑެންޓިފައި ކުރުުމުގެ މަސައްކަތް މިހާރު ދަނީ ކުރަމުން އަދި ތަހްޤީޤާއި ގުޅޭ ގޮތުން ތަޙްޤީޤުގެ މިހާ ކުރީކޮޅު އިތުރު ތަފްސީލް ދިނުމަކީ އުނދަގޫ ކަމެއް ކަމުގައިވެސް އޭނާ ވިދާޅުވިއެވެ.