މަގުމަތިން ބަޔަކު ހަމަލާދީ ޒަޚަމްކޮށްލި ނަމަވެސް، އެނބުރި ދެން މަސައްކަތަށް ނުކުންނަވާނީ މާގަދަކޮށް ކަމުގައި، ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

މިއަދު ދުވެވަޑައިގެންނެވުމަށް ނުކުމެ އުޅުއްވަނިކޮށް، ހެނދުނު މާލޭ ނޫރު މިސްކިތް ކައިރުން ދެމީހަކު ވަނީ ޝަމީމަށް މަރުތޭލަކުން ހަމަލާދީ ޒަޚަމްކޮށްލާފައެވެ. އެދެމީހުން ޝަމީމަށް ހަމަލާދީފައި ވަނީ އެމަނިކުފާނުގެ ފަހަތުން ފާރަލައިގެން ގޮސްކަމުގައި ވަނީ މައުލޫމާތު ލިބިފައެވެ.

ޕީޖީ ޝަމީމް ވިދާޅުވީ، އެހަމަލާގެ ސަބަބުން ވާތުގެ ކަށިގަނޑުގައި ރެނދުއަޅާފައިވާ ކަމަށެވެ. ހަމަލާއަށްފަހު ހޮސްޕިޓަލުގައި ފަރުވާ ހޯއްދެވުމަށްފަހު ގެއަށްވަޑައިގެން ސޯޝަލް މީޑިއާގައި ލިޔުއްވި ޕޯސްޓްގައި ޕީޖީ ޝަމީމް ވިދާޅުވީ، އެނބުރި މަސައްކަތަށް ނުކުންނާނީ، މާވަރުގަދަކޮށް ކަމަށާއި، ބައިސްކަލްދުއްވުމާއި، ފެތުމާއި ކަސްރަތުގެ ކަންކަން މާ ހަލުވިކޮށް ކުރިޔަށް ގެންދަވާނެ ކަމަށެވެ.

ޕްރޮސެކިއުޓަރ ޖެނެރަލްގެ މަޤާމުގައި ހުންނެވި ނަމަވެސް ޕީޖީ ޙުސައިން ޝަމީމަކީ މިހާތަނަށް އާއްމުންގެ ތެރޭގައި ވަރަށް އާދައިގެ ގޮތަކަށް ދިރިއުޅުއްވަމުން ގެންދެވި ބޭފުޅެކެވެ. އާއްމުކޮށް ފަތިހު ދުވެވަޑައިގަންނަވަން ނުކުންނަވާއިރު، ފެތުމާއި އެނޫންވެސް ކަސްރަތުތަކުގައި އާއްމުކޮށް އާއްމު އެހެން މީހުންނާއި އެކު އެމަނިކުފާނު ބޭރުތެރޭގައި އުޅުއްވައެވެ. މިއަދުގެ ހަމަލާއާ ގުޅިގެން ޕީޖީ ޝަމީމަށްދޭ ސެކިއުރިޓީ ވަނީ މަތިކޮށްފައެވެ.