Advertisement
އެމްޑީޕީގެ އިސްބޭފުޅުން -- ފޮޓޯ: ނޫން
ޕީޖީ ޝަމީމަށް ދިން ހަމަލާ އެމްޑީޕީން ކުށްވެރިކޮށްފި
ޕްރޮސެކިއުޓަރ ޖެނެރަލް ޙުސައިން ޝަމީމަށް ދިންހަމަލާ އެމްޑީޕީން ކުށްވެރިކޮށްފިއެވެ.
މާލޭ ނޫރު މިސްކިތް ކައިރިން ޕީޖީ ޝަމީމަށް މަރުތޭލަކުން ބަޔަކު ދިން ހަމަލާ ކުށްވެރިކޮށް، އެމްޑީީޕީން އާއްމުކުރި ބަޔާނުގައި ބުނެފައި ވަނީ، ޖެހިލުމެއްނެތި މިފަދަ ހަމަލާތައް ދެވެނީ މި ސަރުކާރުގެ އިސްވެރިންނާ ރާއްޖޭގައި ކުށްކުރާ ގްރޫޕްތަކާ އޮންނަ ގާތް ގުޅުންތަކާހުރެ އެ ކުށްކުރާ ގްރޫޕްތަކަށް މި ސަރުކާރުން ދޭ ހިމާޔަތުގެ ސަބަބުން ކަމުގައި އެމްޑީޕީން ޤަބޫލުކުރާ ކަމަށެވެ.
އަދި ރައީސް ޑރ މުއިއްޒު ސަރުކާރާ ހަވާލުވެވަޑައިގެން ފަހުން ރައްޔިތުންނަށާއި ދުސްތޫރީ މަސްއޫލިއްޔަތުތަކާ ވާޖިބުތައް އަދާކުރައްވާ ފަރާތްތަކަށް ދެވެންޖެހޭ ހިމާޔަތާއި ރައްކާތެރިކަން ދިނުމުގައި އިހުމާލުވެފައިވާ ކަމުގައިވެސް އެމްޑީޕީން ވަނީ ބުނެފައެވެ. މިގޮތުން ރައްޔިތުންގެ މަޖިލީހުގެ މެމްބަރުންނަށްވެސް އެ މެމްބަރުންނަށް ލިބިދޭންޖެހޭ ރައްކާތެރިކަން ދިނުމުގަޔާއި ނިމިދިޔަ ސަރުކާރުގައި ރާއްޖޭގައި މާރާމާރީ މަދުކުރެވިފައިވަނިކޮށް ރައީސް ޑރ މުއިއްޒު ސަރުކާރާ ހަވާލުވެވަޑައިގެންފަހުން މާރާމާރީތައްވެސް އިތުރުވެފައިވާކަންވެސް އެމްޑީޕީން ވަނީ ފާހަގަކޮށްފައެވެ.
ޕީޖީ ޝަމީމަށް ދިން ހަމަލާއާ ގުޅިން ސިޔާސީ ޕާޓީތަކުންވެސް ވަނީ އެހަމަލާ ކުއްވެރިކޮށްފައެވެ.
