ފ. މަގޫދޫ ފަޅުގެ އިރުމަތީކޮޅުގައި ރިސޯޓެއް ތަރައްގީކުރަން ބީލަން ހުށަހެޅުމުގެ ފުރުސަތު އެ ރަށު ކައުންސިލުން ހުޅުވާލައިފިއެވެ.

މަގޫދޫ ކައުންސިލުން ކުރި އިއުލާނުގައި ބުނީ އެ ރަށު ފަޅުގައި ރިސޯޓެއް ހަދަން ޝައުގުވެރިވާ ރާއްޖެ އާއި ރާއްޖެއިން ބޭރުގެ އިންވެސްޓަރުންނަށް ބީލަމުގައި ރަޖިސްޓްރީ ކުރުމުގެ ފުރުސަތު އަންނަ މަހު 15 ގެ ނިޔަލަށް ހުޅުވާލާފައިވާކަމަށެވެ.

ރިސޯޓް ހަދައި އެތަން ހިންގަން ޝައުގުވެރިވާ ފަރާތްތަކުން ކައުންސިލަށް ސިޓީއެއް ހުށަހަޅައިގެން ބީލަމުގައި ރަޖިސްޓްރީ ކުރެވޭނެ ކަމަށް އެ އިއުލާނުގައި ވަނީ ބުނެފައެވެ.

Advertisement

"މަގުދޫ ޓޫރިޒަމް ޒޯން" ހެދުމަށްޓަކައި 10 ހެކްޓަރުގެ ސަރަހައްދެއް ދިނުމަށް ކައުންސިލުން ވަނީ ނިންމާފައެވެ. ރިސޯޓް ހަދަން ޝައުގުވެރިވާ ފަރާތްތަކަށް ބީލަށް ހުށަހެޅުމުގެ ފުރުސަތު އަންނަ މަހު 28ގެ ނިޔަލަށް އޮންނާނެއެވެ 

ސަރުކާރުން އަންނަނީ މަގޫދޫ ފަޅުގައި އެއާޕޯޓެއް ވެސް ތަރައްގީކުރަމުންނެވެ. ރަންވޭގައި 1،800 މީޓަރު ހުންނާނެ މި އެއާޕޯޓް ތަރައްގީކުރަނީ ޕްރައިވެޓް ޖެޓްތައް ވެސް ހިދުމަތް ދެވޭނެ ފެންވަރަށެވެ.