ޕީޖީ ޝަމީމަށް ހަމަލާދިން މައްސަލައި ތަޙްޤީޤު ފުލުހުން ކުރިޔަށް ގެންދާގޮތް މަޖިލީހުން ބެލުމަށް ރައްޔިތުންގެ މަޖިލީހަށް ހުށައަޅުއްވައިފިއެވެ.

ފުލުހުންގެ ތަޙްޤީޤު ކުރިޔަށްދާ ގޮތް ބެލުމަށް މަޖިލީހަށް މައްސަލަ ހުށައަޅާފައި ވަނީ، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފެވެ.

ރައްޔިތުންގެ މަޖިލީހުގެ ރައީސް މުޙައްމަދު އަސްލަމަށް އެޑްރެސްކުރައްވައި ޙަސަން ލަޠީފް ފޮނުއްވެވި ސިޓީފުޅުގައި އެދިވަޑައިގެންފައި ވަނީ، ހުސައިން ޝަމީމަށް، މާލޭގެ މަގުމަތިން ދިން ނުރައްކާތެރި ހަމަލާގެ ތަޙްޤީޤު މޯލްޑިވްސް ޕޮލިސް ސަރވިސްއިން ސީރިއަސް މައްސަލައެއްގެ ގޮތުގައި ފުރިހަމައަށް ތަޙްޤީޤުކޮށް އެކަށީގެންވާ މުއްދަތެއްގެ ތެރޭގައި އެތަޙްޤީޤު ނިންމާކަން ކަށަވަރުކުރުމަށް ޓަކައި، ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީއަށް އެމައްސަލަ ހުށައަޅުއްވައި ދެއްވުމަށެވެ.

ޕްރޮސެކިއުޓަރ ޖެނެރަލް ޙުސައިން ޝަމީމަށް ޙަމަލާދީފައި ވަނީ މިއަދު ހެނދުނު މާލޭގެ ނޫރު މިސްކިތް ކައިރިންނެވެ. މަރުތޭލަކުން ދިން އެހަމަލާގައި ޕީޖީ ހުސައިން ޝަމީމްގެ ވާތްޕުޅަށް އަނިޔާވިއެވެ.

ޕީޖީ ޙުސައިން ޝަމީމަށް ދިން މިހަމަލާ އާއި ގުޅިގެން އެއްވެސް މީހަކު އަދި މިހާތަނަށް ހައްޔަރުކޮށްފައެއް ނުވެއެވެ.