ރައީސުލްޖުމްހޫރިއްޔާ، ޑރ. މުހައްމަދު މުޢިއްޒު މަޤާމުން ޢަޒުލްކުރުމަށް އިދިކޮޅުން ފަށާފައިވާ މަސައްކަތްތަކާއި ދެކޮޅަށް ޖުމްހޫރީޕާޓީގެ ލީޑަރު ޤާސިމް އިބްރާހިމް ނުކުންނަވައިފިއެވެ.

ޤާނޫނީ އިމުގެ ތެރެއިން ރައީސް ޑރ. މުޙައްމަދު މުޢިއްޒު މަޤާމުން ވަކިކުރުމަށް އިދިކޮޅުފަރާތްތަކުން ކުރާ މަސައްކަތްތަކާއި ދެކޮޅަށް ޤާސިމް އިބްރާހީމް ނުކުންނެވި އިރު އެމަނިކުފާނަކީ، 2012 ވަނަ އަހަރު، އެމްޑީޕީ ސަރުކާރު ވައްޓާލުމުގައި ޢަމަލީ ގޮތުން މަސައްކަތް ކުރެއްވި ބޭފުޅެކެވެ.

ޤާސިމް އިބްރާހީމް އެކްސް އެކައުންޓްގައި ޕޯސްޓްކުރެއްވި ދިގު ބަޔާނެއްގައި ވިދާޅުވީ، ރައީސުލްޖުމްހޫރިއްޔާ، ޤާނޫނު އަސާސީ އާއި ޤާނޫނާއި ޚިލާފު ނުވާހާ ހިނދަކު، އަދި ރައީސުލް ޖުމްހޫރިއްޔާ ކަމުގެ މަޤާމުގެ ޝަރުތުތަކުގެ ތެރެއިން ޝަރުތެއް އުނިނުވާހާ ހިނދަކު، ސިޔާސީ ގޮތުން ބަދަލުހިފުމުގެ ނިޔަތުގައި ތިމާމެން ވެރިކަމާ ހަވާލުވެގަތުމަށްޓަކައި، އެއްވެސް ހަމައެއް ލަމައެއްނެތި ރައީސުލް ޖުމްހޫރިއްޔާ އަޒުލު ކުރުމަކީ ، ނުވަތަ ޢަޒުލުކުރަން ހުށަހެޅުމަކީވެސް، ދިވެހިރައްޔިތުންގެ ނިންމުމުގައި ކޮޅުފައިން ޖެހުމެއް ކަމުގައި ނޫނީ ނުވާނެކަމަށެވެ.  އަދި އަމުދުން ދައުރެއް ނިމެމުންދާ މަޖިލިސްއެއްގެ ތެރެއިން މިފަދަ ޢަމަލެއް ހިންގުމަކީ އެއްގޮތަކަށްވެސް ބަލައިގަނެވޭނޭ ކަމެއް ނޫން ކަމުގައި ޤާސިމް ވަނީ ވިދާޅުވެފައެވެ.

ޤާސިމްގެ އެކްސް އެކައުންޓުން ކުރި ޕޯސްޓް ނިންމާލަމުން ބުނެފައި ވަނީ، މިހާތަނަށް ރައީސް ޑރ މުއިއްޒު ވެރިކަން ކުރައްވަމުން އެގެންދަވަނީ ރައްޔިތުންނާއި ޤައުމަށްޓަކައި، ޤައުމަށް ކުރިއެރުން ހާޞިލް ކޮށް ދިނުމަށްކަމާއި، އެހެން ކަމުން ރައީސުލް ޖުމްހޫރިއްޔާ އަށް ޤާނޫނީ ވެރިކަން ހިންގުމަށް ރައްޔިތުންގެ މަޖިލީހުން ފުރިހަމަ ފުރުޞަތު ދޭންޖެހޭނެކަމަށް އެމަނިކުފާނު ދެކެވަޑައިގަންނަވާ ކަމަށެވެ.

ރައީސުލްޖުމްހޫރިއްޔާ މަޤާމުން ވަކިކުރުމާއި ދެކޮޅަށް ޤާސިމް އިބްރާހިމްގެ އެކްސްއެކައުންޓުގައި ބަޔާނެއް އާއްމުކޮށްފައި ވާއިރު، ޤާސިމް އިބްރާހީމްގެ ދޮށީ ދަރިކަލުން އިބްރާހީމް ސިޔާދު ޤާސިމްއަށް ކުރީ ސަރުކާރާއި މިސަރުކާރުގައިވެސް ހުންނެވީ، އެމްއޭސީއެލް ބޯޑު މެމްބަރު ކަމުގެ މަޤާމުގައެވެ. އަދި ޤާސިމް އިބްރާހިމްގެ އަނބިކަނބަލުން އައިޝަތު ނަޙްލާ ދަނީ ސަރުކާރުގެ ތާއީދު ހޯއްދަވައިގެން، ހުޅުމާލެ ދެކުނު ދާއިރާގެ މަޖިލިސްގޮނޑި ކާމިޔާބު ކުރެއްވުމަށް މަސައްކަތް ކުރައްވަމުންނެވެ.